"Qazilər cəmiyyətə yaxşı nümunə olmalıdır. Son vaxtlar baş verən qəzalarda qazilərin iştirakı artıb və qəzaların əksəriyyəti ölüm və ağır xəsarətlə nəticələnib".
"Far.Az"un xəbərinə görə, bunu Baş Dövlət Yol Polisi İdarəsinin şöbə rəisi, polis mayoru Rövşən Tağıyev QHT-lərə Dövlət Dəstəyi Agentliyinin dəstəyi ilə “Müstəqil Nəqliyyatçılar” məsləhət və informasiya İctimai Birliyinin “Nəqliyyat vasitələri idarə edən müharibə iştirakçılarının problemləri: həlli yolları və perspektivlər” adlı layihəsinin yekun konfransında deyib.
O bildirib ki, qazilərimizin problemi və qayğıları daima Daxili İşlər Nazirliyinin rəhbərliyinin diqqət mərkəzindədir:
"Səlahiyyətimizə aid olan problemlər quruma daxil olursa dərhal rəhbərliyin nəzarəti ilə lazımı tədbirlər görülür. Qazilərimiz bilməlidilər ki, əvvəllər azyaşlı uşaqlar film qəhrəmanlarını özlərinə nümunə götürürdülərsə, indi real qəhrəmanlarımız olan qazilərimizi nümunə götürürlər. Belə olan halda qazilərimizin də üzərinə böyük bir məsuliyyət düşür. Mən hər bir qazimizdən xahiş edərdim ki, bütün bunları nəzərə alıb yollarda diqqətli olsunlar və yol hərəkəti qaydalarına riayət etsinlər. Təəssüflər olsun ki, son zamanlar baş verən qəzalarda qazilərimizin iştirakı artıb. Mübaribədən zəfərlə sağ-salamat gələn bir çox qazimiz yol-nəqliyyyat hadisəsi nəticəsində həyatını itirib. Bu bizim üçündə cəmiyyət üçündə çox ağır bir faciədir".