Bu gün Ankarada Türkiyə Cümhuriyyətinin qurulmasının və Ümummilli Lider Heydər Əliyevin anadan olmasının 100-cü ildönümü ilə bağlı konfrans keçirilib.
“Far.Az"un Ankara bürosunun məlumatına görə, tədbir Azərbaycanın Türkiyədəki Səfirliyinin, Azərbaycan Memarlıq və İnşaat Universitetinin birgə təşkilatçılığı ilə Bilkent Universitetində baş tutub.
Konfransda Azərbaycanın Türkiyədəki Səfirliyinin müşaviri Eldar Əliyev, səfriliyin əməkdaşları, Bilkent Universitetinin rektoru, professor Abdurrahman Kürşat Aydoğan, Azərbaycan Memarlıq və İnşaat Universitetinin prorektoru Akif Qasımov, azərbaycanlı millət vəkili Vüqar İsgəndərov, Türkiyənin Azərbaycandakı keçmiş səfiri Hulusi Kılıç, Bilkent Universitetinin müəllim-tələbə heyəti və başqaları iştirak ediblər.
Tədbirdə Türkiyə Cümhuriyyətinin qurucu lideri Mustafa Kamal Atatürkün və Azərbaycanın Ümummilli Lideri Heydər Əliyevin ictimai-siyasi fəaliyyəti haqqında danışılıb.
Türkiyə Cümhuriyyətinin qurulduğu 1923-cü ildə Heydər Əliyevin anadan olması qeyd edilib. Türkiyəni möhkəm təməllər üzərində quran Atatürkün fəaliyyətləri, Türk dövlətlərinə və xüsusən Azərbaycana olan diqqəti vurğulanmaqla yanaşı, Heydər Əliyevin Azərbaycan dövlətçilik tarixində və Türk dünyasındakı rolundan bəhs edilib.
Bilkent Universitetinin müəllimi Seçkin Köstem "Cümhuriyyətin 100-cü ilində Türkiyə xarici siyasəti və Azərbaycan" mövzusunda məruzə ilə çıxış edib.
Tədbir Azərbaycan və Türkiyə nümayəndələrinin mükafatlandırılması və konsert proqramı ilə başa çatıb.