“Yeni tikiləcək olan Yengicə su anbarı Qəbələ rayonu ərazisində olacaq”.
FAR.AZ xəbər verir ki, bunu Dövlət Ekoloji Ekspertiza Agentliyinin sədri Mirsalam Qənbərov deyib.
Onun sözlərinə görə, 130 hektarı əhatə edəcək su anbarının texniki quruluşu və yerləşdiyi relyefə görə ekoloji baxımdan digər göllərdən daha səmərəli olacaq: “Bu anbar Qəbələ rayonunun 10 min ha ərazisinin suvarılmasına xidmət edəcək”.
Mirsalam Qənbərov deyib ki, Yengicə su anbarının tikintisinə bu il başlanılacaq:
"Tikinti 28 aya yekunlaşacaq. Paralel olaraq kanalların və suvarma şəbəkələrinin layihələndirilməsi aparılacaq".
Azərbaycan Meliorasiya və Su Təsərrüfatı ASC-nin "Azdövsutəslayihə" institutunun direktoru Elbrus Paşayev isə deyib ki, Yengicə su anbarının əhatə edəcəyi 5-6 hektar ərazi xüsusi mülkiyyətə düşür:
"Qalan hissə dövlət və bələdiyyə mülkiyyətinə aid olan hissələrdir. Bu sahələrdə sıx meşə zonası yoxdur, kol-kos sahəni əhatə edir. Yengicə su anbarı 17,5 mln su həcminə malikdir. Bunun 5 mln hissəsi ölü həcmə gedir. Qalan 12 mln həcmdə su isə istifadəyə yararlı həcmə aiddir".
İnstitut direktoru deyib ki, Yengicə su anbarı layihəsi çərçivəsində suyun tərkibi öyrənildikdən sonra, oradakı su içmək üçün tam yararlılıq testlərindən və ya əlavə təmziləmə işlərindən keçərsə, ətraf kəndlərin də içməli su ilə təminatı məsələsinə baxıla bilər:
"Hələlik ətraf kəndlərdə ciddi bir içməli su problemi yoxdur. Lakin ehtiyac olarsa mümkün ola bilər. Yengicə su anbarının tikintisi zamanı hansısa vətəndaşların köçürülməsi nəzərdə tutularsa mütləq kompensasiya ödəniləcək. Bunun üçün bizim mütəxəssislər yerində araşdırma aparır. Nəinki torpaq sahəsi, həyətdə olan ağaclar da hesablanır və qiymətləndirilir. Qiymətləndirilmə sərbəst ekpertlər tərəfindən aparılacaq və lazımi qaydada kompensasiya ödəmələri ediləcək".
