“Gürcüstan regionun üç ölkəsinin iştirakı ilə Cənubi Qafqazda sülh naminə yeni əməkdaşlıq platformasının yaradılmasını təklif edə bilər”.
Bunu “Report”a açıqlamasında gürcüstanlı politoloq Vaxtanq Maisaya deyib.
Onun sözlərinə görə, Cənubi Qafqazda təhlükəsizlik məsələlərinə həsr olunmuş Münhen Təhlükəsizlik Konfransının panelində regionun üç ölkəsinin liderlərinin iştirakı tarixi məqamdır: “Bu, əməkdaşlığın yeni formatının mümkünlüyündən xəbər verir”.
V.Maisayanın fikrincə, bu, regional təhlükəsizliyə müsbət təsir edəcək çox mühüm addımdır: “Azərbaycanla Ermənistan arasında sülh sazişinin hazırlanmasına çox vaxt qalmayıb. Tərəflər faktiki olaraq belə bir sazişi imzalamağa hazır olduqlarını etiraf ediblər. Odur ki, zənnimcə, Gürcüstan regionun üç ölkəsinin iştirakı ilə Cənubi Qafqazda sülh naminə yeni əməkdaşlıq platformasının yaradılmasını təklif edə bilər”.
Politoloq vurğulayıb ki, bu mənada Zəngəzur dəhlizinin rolu daha da artır: “Burada artıq Azərbaycan, Gürcüstan və Ermənistan arasında əməkdaşlıq üçün ümumi geoiqtisadi əsas yaranıb. Düşünürəm ki, Zəngəzur dəhlizi də Çini Avropa İttifaqı ilə və əks istiqamətdə birləşdirəcək Orta Dəhlizin inkişaf potensialını artıracaq”.