"Uzun müddətdir ki, Azərbaycanın ümumi daxili məhsulunun (ÜDM) 1/3 hissəsi, dövlət büdcəsinin 50-55 %-i, ixracın isə 90 %-dək hissəsi birbaşa neft sektorundan qidalanır".
Bu barədə “Far.Az”a iqtisadçı ekspert Xalid Kərimli deyib.
"Ölkəmizin də əsas məqsədi iqtisadiyyatı diversifikasiya etməklə qeyri-neft sektorunu aparıcı mövqeyə gətirməkdir. İqtisadiyyatın diversifikasiya olunması, yəni qeyri-neft sektorunun inkişaf etdirilməsi üçün ölkəmiz son zamanlar həm rəqabət mühitinin təkmilləşdirilməsi baxımdan, həm qanunvericiliyin, həm də gömrük-vergi mühitinin təkmilləşdirməsi baxımından əhəmiyyətli addımlar atır. Qeyri-neft sektoruna müxtəlif güzəştlər verilir. Yəni ölkə qeyri-neft sektoruna yerli və xarici investisiyaların qoyulmasında maraqlıdır. Bu baxımdan investisiyaların təşviqi üçün tədbirlər görülür”, - ekspert bildirib.
İqtisadçı qeyd edib ki, Qarabağda yaradılan sənaye parklarına rezidentlərin cəlbi prosesi həyata keçirilir:
“Bu təşviqin formalarından biri sənaye və texnologiya parklarının, sənaye məhəllələrin yaradılmasıdır ki, burada əlverişli vergi və inzibatçılıq mühiti mövcuddur. Azərbaycanda hazırda 7 sənaye parkı mövcuddur. Bunların ikisi Qarabağda yaradılıb.
Bundan başqa, “Ələt Azad İqtisadi Zona”sının yaradılması bu aspektdə xüsusi bir layihə kimi nəzərdən keçirilir. Belə bir zonanı yaratmaqla investisiyaların cəlbi gözlənilir və bu istiqamətdə addımlar atılır.
Ölkəmizdə Sahibkarlığın İnkişafı Fondunun vasitəçiliyi ilə qeyri-neft sektoruna ayrılan kredit resurslarının cəlbediciliyi də artırılır. Qeyri-neft sektoruna yatırılan investisiyaların, kreditlərin güzəştli olması üçün resurslar ayrılır, kreditlərin maliyyələşməsi üçün mənbələr yaradılır”.
Ekspert qeyd edib ki, həm ümumi şəkildə iqtisadiyyatın, həm də investisiyalarının cəlbediciliyini artırmaq üçün tədbirlər görülür.
“Spesifik sənaye və texnologiya parklarını, məhəllələri və azad zonanı yaratmaqla xarici və yerli investisiyaların qeyri-neft sektoruna cəlbi nəzərdə tutulur".
