"Bəzi qeyri-ciddi sosial şəbəkə səhifələrində yayımlanmış, Kliniki Tibbi Mərkəzdə çəkildiyi iddia edilən fotoşəkil saxtadır və bunu qərəzli paylaşımlar hesab edirik".
Bu barədə FAR.AZ-ə Kliniki Tibbi Mərkəzdən məlumat verilib.
"Bunu yayan ilk mənbə ilə də əlaqə saxlanılıb, bu cür saxta və böhtan xarakterli paylaşıma görə etiraz olunub. Onlardan həmin saxta paylaşımın yığışdırılması tələb olunub, əks təqdirdə məhkəməyə müraciət ediləcəyi bildirilib.
Kliniki Tibbi Mərkəz olaraq digər sosial şəbəkə səhifələrindən və eləcə də ciddi xəbər saytlarından xahiş edirik ki, bu cür dəqiqləşdirilməmiş, saxta və böhtan xarakterli fotoşəkillərin, o cümlədən məlumatların yayılmasında vasitəçi olmasınlar.
Bir daha bildiririk ki, Kliniki Tibbi Mərkəzin Mətbuat xidməti bütün media nümayəndələrinə hər zaman açıqdır və istənilən məlumatı operativ cavablandırmağa hazırdır", - mərkəzdən qeyd olunub.
***16:05
Sosial şəbəkədə qazlı içki şüşəsində xəstəyə sistem qoşulması ilə bağlı görüntü yayılıb.
FAR.AZ xəbər verir ki, görüntünün 1 saylı Kliniki Tibbi Mərkəzdə çəkildiyi iddia olunur.
“Qafqazinfo” məsələ ilə bağlı 1 saylı Kliniki Tibbi Mərkəzlə əlaqə saxlayıb. Tibb müəssisəsindən sorğumuza cavab olaraq bildirildi ki, məsələ araşdırılıb və təsdiqini tapmayıb.
FAR.AZ