Noyabrın 21-də Qızılağac Milli Parkında Azərbaycanda ilk dəfə “Flaminqo festivalı” keçirilib.
“Far.Az” xəbər verir ki, festival çərçivəsində iştirakçılar üçün Qızılağac Milli Parkı ərazisində qayıq və kvadrasikllarla gəzinti təşkil edilib, ziyarətçilər körfəz ərazisində quş koloniyalarını müşahidə ediblər.
Festivalda konsert proqramı təşkil olunub, ziyarətçilər stendləri gəzərək Azərbaycandakı milli parklarla virtual tanışlıq imkanı qazanıblar.
Həmçinin festival çərçivəsində 1 milyon çəkikimi balıq körpəsi Qızılağac Milli Parkının körfəz ərazisinə, milli parkın faunasına xas olan turac quşları isə təbiətə buraxılıb.
Xatırladaq ki, festivalda Azərbaycanın qorunan ərazilər şəbəkəsini, iqlim dəyişməsinin biomüxtəlifliyə təsiri və bioloji müxtəlifliyin hazırki vəziyyətini əks etdirən stendlər, məlumat lövhələri, milli parkların təbiətinə, flora və faunasına aid tanışlıq guşələri, suvenirlər, həmçinin Qızılağac Milli Parkını tərənnüm edən simvollar nümayiş etdirilib.
Festivalda dövlət qurumları, qeyri-hökumət təşkilatları, universitetlər və beynəlxalq təşkilatların nümayəndələri iştirak edib, 500-dən artıq turist tədbirlərə qatılıb.
Qızılağac Milli Parkında Flaminqo Festivalı başlayıb.
“Far.Az”un cənub bürosunun məlumatına görə, ilk dəfə təşkil olunan Flaminqo Festivalı axşam saatlarınadək davam edəcək.
Festival ərazisində Azərbaycanda fəaliyyət göstərən milli parkların stendləri qurulub. İştirakçıların hər birinə festivalın loqosu əks olunan döş nişanları və papaqlar paylanılıb.
Stendlərlə tanış olan iştirakçıların balıqartırma zavodu tərəfindən yetişdirilən müxtəlif növ balıqların olduğu böyük akvariumu izləmə imkanı olacaq. Festival çərçivəsində “Qırmızı Kitab”ın III nəşrinin təqdimatı, ekoviktorinanın keçirilməsi, canlı olaraq Turac quşlarının milli parka buraxılması planlaşdırılır.
Festivalın yaddaqalan olması üçün iştirakçılara parkın girişində olan göldə flaminqo və digər nadir su quşları nümayiş olunacaq, tədbir boyu park ərazisində faytonla gəzinti təmin ediləcək. Həmçinin, Qızılağacda yaradılmış yeni turizm marşrutunun təqdimatı və bu marşrut üzrə ilk dəfə “Quş bazarına” qayıqlarla gəzintinin təşkili də festivala xüsusi rəng qatacaq.
Bundan başqa, festivalda kvadrasiklların yarışı, ekstremal şəraitdə sağ qalmaq metodlarının əyani icrası və ilanlarla davranış qaydaları nümayiş olunacaq.
Flaminqo konseptinə (rənglər, dizayn və s.) uyğun təşkil edilən festivalda yerli suvenirlərin və əl işlərinin satış yarmarkası da olacaq.
