Azərbaycanlı bodibilder Rasim Həsənov Buxarestdə keçirilən “Mister Olympia Amateur Eastern Europe” beynəlxalq turnirində “Men’s physique” kateqoriyasında dördüncü yeri tutub. Bununla da o, ölkədə sözügedən idman növündə bu qədər yüksək pilləyə qalxan yeganə atlet olub.
Qeyd edək ki, Beynəlxalq Bodibildinq və Fitness Federasiyası (IFBB) tərəfindən keçirilən sözügedən yarış həvəskar bodibilderlər arasında dünyanın ən nüfuzlu turnirlərindən biridir – Azərbaycan bu turnirdə tarixdə ilk dəfə təmsil olunub və ən yaxşıların beşliyinə düşüb.
Onu da vurğulayaq ki, məhz R. Həsənov 2021-ci ilin mayında keçirilən Avropa çempionatında “Muscular Men’s physique” üzrə Azərbaycana tarixdə ilk dəfə olaraq qızıl medal qazandırıb. Azərbaycanlı bodibilder debütant olduğundan bu, onun qələbəsini daha da yaddaqalan edib.
Bodibilder 2021-ci ilin sentyabrında “Arnold Classic” nüfuzlu beynəlxalq turnirdə qızıl medal, həmin ilin noyabrında isə İspaniyada keçirilən dünya çempionatında “Muscular Men’s Physique” açıq qiymətləndirmə kateqoriyasında gümüş medal qazanıb.
BAKU.WS