"Sabah"a qarşı bizim öz oyun planımız var".
"Report" xəbər verir ki, bunu "Səbail"in futbolçusu Ağabala Ramazanov klubun rəsmi saytına açıqlamasında bildirib.
29 yaşlı hücumçu Azərbaycan Premyer Liqasının V turu çərçivəsində keçiriləcək lider "Sabah"la oyunun onları qorxutmadığını qeyd edib: “Onlar çempionatın favoritlərindən biri sayılır. Cari mövsümə uğurlu başlayıblar. Amma bu bizi qorxutmur. Son turda “Kəpəz”ə qarşı qazandığımız qələbədən sonra əhvali-ruhiyyəmiz yüksəkdir. Bir qələbəyə ehtiyacımız var idi və onu qazandıqdan sonra var gücümüzlə “Sabah”la oyuna hazırlaşırıq. Bizi ağır səfər matçı gözlədiyini bilirik. Ancaq biz əlimizi-qolumuzu sallayıb rəqibin üzərimizdə rahat oyun qurmasını izləməyəcəyik. Bizim də öz oyun planımız var. Məşqçilərin tapşırıqlarına uyğun olaraq bu duelə hazırlaşırıq. Səfərdən yaxşı nəticə ilə qayıdacağımızı düşünürəm”.
Komandanın kapitanı olan Rahid Əmirquliyev isə ötən tur “Kəpəz”lə oyunda qazandıqları qələbənin onlar üçün yaxşı motivasiya olduğunu bildirib: "Bu qələbəyə ehtiyacımız var idi. Komandada ab-hava daha yaxşıdır. İrəlidə bizi “Sabah”a qarşı vacib oyun gözləyir. Masazır təmsilçisi hazırda yaxşı formadadır. Premyer Liqada çıxdığı 4 görüşün 4-nü də qazanmağı bacarıb. Çempionluğa iddialı komandalardan biridir. Səfərdə oynayacağıq. Buna görə də düşünürəm ki, bizi çətin və maraqlı qarşılaşma gözləyir. Amma bizim də çox yaxşı komandamız var. “Sabah”la oyuna ciddi şəkildə hazırlaşırıq. Səfərdən layiqli nəticə ilə qayıdacağımıza inanıram”.
Qeyd edək ki, "Sabah" – "Səbail" oyunu 4 sentyabrda keçiriləcək. "Bank Respublika Arena"da baş tutacaq qarşılaşma 18:00-da başlayacaq.