Dünyanın ən yaşlı kişisi, Venesuela sakini Xuan Visente Peres Mora 115 yaşında vəfat edib.
“Report” TASS-a istinadən xəbər verir ki, bu barədə Venesuela Prezidenti Nikolas Maduro "X" səhifəsində bildirib.
O, Xuan Visente Peres Moranın ailəsinə başsağlığı verib.
Bildirilib ki, ən yaşlı adam 114 il 339 gün yaşayıb. O, 115-ci yaşında tənəffüs yollarında ağırlaşma səbəbindən ölüb. Peres Mora uzunömürlülüyünü daimi iş, yaxşı istirahət, erkən yuxu və gündəlik bir stəkan brendi ilə əlaqələndirirmiş.
Məlumata görə, uzunömürlü yaxşı yeyib, dua edib, su içib və tez yatıb.
Peres Mora 1909-cu il mayın 27-də Venesuelanın El Kobre şəhərində doğulub. O, ailədə 10 uşaqdan 9-cusu olub. Ən uzunömürlü kişinin 11 uşağı var. Qəzetin qeyd etdiyi kimi, Peres Mora bu yaxınlarda San Xose de Bolivarda bir fermada yaşayırmış.
