"Bildiyiniz kimi, torpaqlarımız işğaldan azad edildikdən sonra cənab prezidentin tapşırıqları əsasında azad edilmiş ərazilərdə quruculuq, abadlıq işlərinə start verilib".
Bunu "Report"un Qarabağa ezam olunmuş müxbirinə Məcburi Köçkünlərin Sosial İnkişaf Fondunun direktor müavini Vüqar İmranov deyib.
V.İmranovun sözlərinə görə, bu quruculuq-abadlıq işləri ilk olaraq infrastruktur layihələri ilə həyata keçirilib. Bura yolların çəkilməsi, enerji və başqa layihələr daxildir:
"Layihəyə uyğun olaraq artıq Ağalı və Talış kəndlərində həyat qurulub. Həmçinin Laçının mərkəzində işlər yekunlaşmaq üzrədir. Paralel olaraq Laçının Zabux və Sus kəndlərində quruculuq işləri aparılır.
Hər birimizin bildiyi kimi bir neçə gün öncə cənab prezidentin işğaldan azad olunmuş ərazilərə növbəti səfəri baş tutub. Səfər çərçivəsində cənab prezident bir neçə layihələrin təməlqoyma mərasimində iştirak edib. Onların biri də Cəbrayıl rayonunun Şükürbəyli kəndi ərazisində baş verib. Məlumat üçün bildirim ki, Cəbrayılın Şükürbəyli kəndi ətrafda yerləşən 4 kəndin birləşməsi nəticəsində layihə üzrə 1 042 ailəlik layihə hazırlanıb. İlkin olaraq 635 fərdi yaşayış evinin tikintisi həyata keçiriləcək. Paralel olaraq bağça, məktəb, musiqo məktəbi, sağlamlıq və inzibati mərkəz və başqa bu kimi sosial obyektlərin də tikintisi nəzərdə tutulur.
İkinci belə təməlqoyma Laçın rayonunun Güləbird kəndində həyata keçirilib. Bu cənab Ali Baş Komandanın Güləbirdə ikinci səfəri idi. Birinci səfər zamanı kəndin işğaldan azad edildiyi vaxt gəlib Azərbaycanın üçrəngli bayrağını dalğalandırmışdı. İkinci səfər zamanı isə 580 fərdi yaşayış evindən ibarət təməlqoymada iştirak edib. Baş Plan üzrə birinci mərhələdə 150 evin tikintisi həyata keçiriləcək. Paralel olaraq müəyyən sosial obyektlər və infrastruktur obyektlərin tikintisi də nəzərdə tutulub. Belə ki, kənddə 432 yerlik orta məktəb, 80 yerlik uşaq bağçası inzibati bina və s. tikintisi də planlaşdırılır".