Hacıqabulda 23 yaşlı oğlu ilə 16 yaşlı qızı evləndirən ataya hökm oxunub.

BAKU.WS Lent.az-a istinadən xəbər verir ki, hadisə Meyniman kəndində qeydə alınıb.

İttiham aktına görə, 49 yaşlı Elsevər Həmidov (ad və soyad şərtidir) 23 yaşlı oğlu ilə 16 yaşlı qız üçün evlərinin həyətində toy məclisi qurub. Lakin daxil olan məlumat əsasında polis əməkdaşları müdaxilə edərək, toy məclisini dayandırıblar. Elsevər Həmidov ifadə vermək üçün polis şöbəsinə aparılıb və barəsində Cinayət Məcəlləsinin 176-2-ci (On altı yaşına çatmayan şəxsin erkən evliliyinin təşkili) maddəsi ilə cinayət işi açılıb.

Təqsirləndirilən şəxs ifadəsində bildirib ki, 23 yaşlı oğlu üçün qız axtarıblar və Sabirabadda Günay (şərti adla) adlı qızın çox tərbiyəli olduğunu ona deyiblər. Nəticədə Elsevər ailəsi ilə iki dəfə qızın evinə elçiliyə gedib. Lakin qızın 16 yaşı olduğunu sonradan, onlara molla kəbini hazırlamaq üçün şəxsiyyət vəsiqəsi istəyəndə biliblər. Əvvəlcə yaş məsələsinə görə ailələr arasında narazılıq yaransa da, Elsevər sonradan toy etmək fikrinə düşüb. Buna səbəb isə onun digər oğlunun xəstə olması və qardaşının toyunu görmək istəməsi olub. Elsevər bildirib ki, toy zamanı gəlin iştirak etməyib. Niyyətləri, sadəcə, toy məclisi keçirmək, gəlini isə 18 yaşı tamam olandan sonra gətirmək olub. Onların bu fikirləri ilə qız evi də razılaşıb.

Zərərçəkən Günay ifadəsində orta məktəbin 5-ci sinfinə qədər təhsil aldığını, təqsirləndirilən şəxsə qarşı şikayət və tələbinin olmadığını deyib.

Təqsirləndirilən şəxs əməlindən peşman olduğunu deyərək, məhkəmədən barəsində yüngül cəza verilməsini xahiş edib.

Məhkəmənin qərarı ilə Elsevər Həmidov 1 il müddətinə azadlığın məhdudlaşdırılması cəzasına məhkum edilib. Ona, həmçinin elektron qolbaq taxmaq, bir il ərzində Hacıqabulu tərk etməmək və gecə saat 11-dən səhər saat 7-dək evdən çıxmamaq tapşırılıb.

Oxşar xəbərlər

Leyla Əliyevanın təşəbbüsü ilə uşaq evlərinin komandaları arasında növbəti minifutbol turniri təşkil olunub

Azərbaycanda mülki aviasiya xidmətləri ilə bağlı tariflər QÜVVƏYƏ MİNDİ

Xocalının Təzəbinə kəndində ailələrə evlərinin açarları təqdim olunub

Şuşa Dövlət Musiqili Dram Teatrında inkluziv bir qizin mono tamaşası

İlham Əliyev Xocavəndin Xanoba kəndində fərdi evlərin və infrastrukturun bərpası sahəsində görülən işlərlə tanış olub