Ədliyyə Nazirliyinin Məhkəmə Ekspertiza Mərkəzində yüksək vəzifəyə təyinat vədi ilə vətəndaşdan 64 min manatdan çox pul almaqda təqsirləndirilən iki nəfərin cinayət işi üzrə məhkəmə araşdırması yekunlaşıb.

BAKU.WS "Qaynarinfo"ya istinadən xəbər verir ki, Bakı Ağır Cinayətlər Məhkəməsinin hökmü ilə hər iki şəxs Cinayət Məcəlləsinin 178.3.2-ci maddəsi (qabaqcadan əlbir olan bir qrup şəxs tərəfindən külli miqdarda ziyan vurmaqla törədilən dələduzluq) ilə təqsirli bilinib.

Məhkəmə araşdırması zamanı müəyyən olunub ki, təqsirləndirilən şəxslər zərərçəkmişə oğlunun Ədliyyə Nazirliyinin Məhkəmə Ekspertiza Mərkəzində rəis müavini vəzifəsinə təyin ediləcəyini vəd ediblər. Bu məqsədlə onlar müxtəlif vaxtlarda zərərçəkmişdən ümumilikdə 64 min 75 manat alıblar.

İş materiallarına əsasən, pul vəsaitinin bir hissəsi Bakıda Montin bağı və "Qəsr" restoranında keçirilən görüşlər zamanı nağd şəkildə verilib, digər hissəsi isə təqsirləndirilən şəxslərin istifadə etdikləri bank kartlarına köçürülüb. Zərərçəkmiş məhkəmədə ifadəsində bildirib ki, oğlunun dövlət qurumunda yüksək vəzifəyə təyin olunacağına inanaraq tələb olunan məbləği hissə-hissə ödəyib. Lakin sonradan nə verilən vəd yerinə yetirilib, nə də pullar geri qaytarılıb. Bundan sonra o, hüquq-mühafizə orqanlarına müraciət edib.

Təqsirləndirilən şəxslər isə məhkəmədə özlərini təqsirli bilməyiblər. Onlardan biri pul almadığını və yalnız tərəfləri tanış etdiyini iddia edib. Digəri isə vəzifəyə təyin olunacağı ilə bağlı heç kimə qəti söz vermədiyini, sadəcə, məsələ ilə maraqlanacağını bildirdiyini deyib.

Məhkəmə şahid ifadələrini, bank köçürmələrini, ödəniş qəbzlərini və digər sübutları araşdırdıqdan sonra ittihamın tam sübuta yetirildiyi qənaətinə gəlib. Hökmə əsasən, təqsirləndirilən şəxslərdən biri beş il müddətinə azadlıqdan məhrum edilib. Lakin Cinayət Məcəlləsinin 70.1-ci maddəsi (şərti məhkum etmə) tətbiq olunaraq cəza şərti hesab edilib və ona iki il sınaq müddəti təyin olunub. Digər təqsirləndirilən şəxsə isə 5 il 6 ay müddətinə azadlıqdan məhrumetmə cəzası verilib. Əvvəlki məhkumluğu nəzərə alınaraq cəzalar qismən toplanılıb, şübhəli şəxs qismində saxlanıldığı iki gün ümumi cəzadan çıxılıb.

Nəticədə ona qəti olaraq 6 il 5 ay 28 gün müddətinə azadlıqdan məhrumetmə cəzası təyin edilib.

Oxşar xəbərlər

Prezident İlham Əliyev Əfv Sərəncamı imzalayıb

122 minlik çantası, 220 minlik libası, 500 minlik evi ilə gündəm olan MƏŞHURLAR - SİYAHI

Dövlət Xidmətində yüksək vəzifəyə yeni TƏYİNAT

Leyla Əliyeva "Mənzərəyə açılan ev" mövzusunda qrup sərgisində iştirak edib

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3