Üçtəkanla tullanma növündə çıxış edən Yekaterina Sariyeva Avropa çempionatında müəyyənləşdirdiyi Azərbaycan rekordunu (13,91 metr) növbəti dəfə yeniləmək niyyətindədir.

İdmançı bunu "Report"a açıqlamasında deyib.

O, böyük yarışda növbəti uğura imza atdığı üçün şad olduğunu bildirib:

"Belə möhtəşəm turnirdə yeni Azərbaycan rekorduna imza atdığım üçün çox şadam. Qitə birinciliyinin səviyyəsini və güclü rəqabəti nəzərə alsaq, 13,91 metr nəticə şəxsən mənim üçün çox vacibdir. Əlbəttə, finala vəsiqə qazanmaq istəyərdim. Lakin ilk növbədə müsbət məqamları görməyə çalışıram. Bu ölkə rekordu böyük əməyin bəhrəsidir və doğru yolda olduğumu göstərir".

Y.Sariyeva turnirə hazırlıq prosesinin planlaşdırılmış şəkildə keçdiyini diqqətə çatdırıb:

"Gündə iki dəfə məşq edirdik. Əsas diqqəti qaçış texnikasına, tullanma fazalarına və icranın sabitliyinə yönəltmişdik. Hesab edirəm ki, sistemli iş, özünəinam və startdan əvvəlki düzgün köklənmə həlledici rol oynadı. Müəyyən detallar üzərində uzun müddət işləyəndə, bu, nəticədə də əksini tapmağa başlayır".

İdmançı əsas məqsədini də açıqlayıb:

"Avropa çempionatındakı bu göstərici beynəlxalq səviyyədə rəqabət apara bildiyimi göstərir. Lakin hələ üzərində işləməli olduğum məqamların olduğunu da anlayıram. Növbəti ildə əsas vəzifəm inkişafa davam etmək və Yay Olimpiya Oyunlarına lisenziya uğrunda mübarizə aparmaqdır. Buna görə də beynəlxalq yarışlarda sabit çıxış etmək, nəticələrimi yaxşılaşdırmaq vacibdir. Əlbəttə, bununla kifayətlənmək istəmirəm, rekordu bir daha təzələmək və daha yüksək səviyyəyə qalxmaq niyyətindəyəm".

Qeyd edək ki, Yekaterina Sariyeva İngiltərənin Birmingem şəhərində keçirilən Avropa çempionatında 13,91 metr nəticə göstərərək özünəməxsus əvvəlki Azərbaycan rekordunu (13,89 metr) yeniləyib.

Oxşar xəbərlər

Masazır əhalisinə ŞAD XƏBƏR - artıq YEKUNLAŞIR

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

"Şahdağ"da "Azerbaijan Open" beynəlxalq dağ xizəyi turniri: 11 ölkədən 20 idmançı mübarizə aparır