Bu il Şəffaflığın təmin edilməsi üzrə ikiillik hesabatların (BTR) təqdim edilməsi xüsusi əhəmiyyət daşıyır, çünki bu hesabatlar Paris Sazişinin ikinci qlobal qiymətləndirilməsi üçün əsas məlumat mənbələrindən biri olacaq.

"Report" xəbər verir ki, bunu COP31-in icraçı direktorunun müavini və danışıqlar prosesinin sədri Devid Hiqqins "Bakı İqlim Fəaliyyəti Həftəsi 2026" (BCAW 2026) çərçivəsində keçirilən panel sessiyasında deyib.

Onun sözlərinə görə, 2024-cü ildə təqdim edilmiş BTR-lər ölkələrin Paris Sazişi çərçivəsində öhdəliklərin yerinə yetirilməsi üzrə işini nümayiş etdirdi və gələcək beynəlxalq əməkdaşlıq üçün istiqamətləri müəyyənləşdirdi.

"Təqdim olunmuş 137 məruzənin hər biri böyük bir işin nəticəsidir və iqlim fəaliyyətləri haqqında çoxlu sayda qiymətli məlumat ehtiva edir, onların hər biri təqdirə layiqdir", - Hiqqins bildirib.

Hiqqins həmçinin ikiillik şəffaflıq məruzələrinin (BTR) hazırlanmasında çətinlik çəkən ölkələrə beynəlxalq dəstəyin vacibliyini vurğulayıb və BMT-nin Ətraf Mühit Proqramının (UNEP), BMT-nin İnkişaf Proqramının (UNDP) və BMT-nin Ərzaq və Kənd Təsərrüfatı Təşkilatının (FAO) töhfəsini qeyd edib. O əlavə edib ki, COP31 çərçivəsində 2026-cı ildə öz BTR-lərini təqdim edəcək ölkələrin qeyd olunması planlaşdırılır.

COP30-un icraçı direktoru və Braziliyanın iqlim dəyişikliyi üzrə milli katibi Ana Toni isə qeyd edib ki, BTR-lər yalnız beynəlxalq öhdəlik deyil, həm də təcrübə mübadiləsi və iqlim siyasətinin təkmilləşdirilməsi üçün mühüm vasitədir.

"Birinci dövr bu prosesin nə qədər uğurlu olduğunu və neçə ölkənin öz məruzələrini hazırlaya bildiyini göstərdi. Lakin eyni zamanda, o, hələ nə qədər iş görməli olduğumuzu da göstərdi", - Toni deyib.

O, BTR-in hazırlanması üçün lazımi məlumat bazalarına və sistemlərə hələ malik olmayan ölkələrə dəstək verilməsinin zəruriliyini vurğulayıb.

"Söhbət sadəcə bunu etmək istəyindən getmir - söhbət imkanların olmasından gedir. Buna görə də belə ölkələrə dəstək mütləq zəruridir", - deyə o qeyd edib.

Toninin sözlərinə görə, etibarlı məlumatlar səmərəli iqlim siyasətinin işlənib hazırlanması üçün əsas əhəmiyyətə malikdir. O bildirib ki, Braziliya özünün ikinci BTR-ni COP31-ə qədər təqdim edəcək.

Oxşar xəbərlər

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Global Media Group BMT-nin Qlobal Sazişi ilə birgə "Dayanıqlı yaşayış mühitinin dili" mövzusunda media sessiyası təşkil edib

Prezident Davosda "Avrasiyanın iqtisadi özünəməxsusluğunun müəyyənləşdirilməsi" mövzusunda panel iclasında iştirak edib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN