Azad edilmiş ərazilərdə ilk istixana sənaye zonası Cəbrayıl rayonunda qurulur.

"Report"un Ağdama ezam olunmuş əməkdaşı xəbər verir ki, bunu kənd təsərrüfatı naziri Məcnun Məmmədov bu rayonda keçirilən 100-cü Yubiley Aqrar Biznes Festivalı çərçivəsində təşkil olunmuş tədbirdən sonra jurnalistlərə açıqlamasında bildirib.

Onun sözlərinə görə, ilk dəfə ölkədə istixanaların məhz sənaye zonası, vahid məkanda təşkili nəzərdə tutulub: "Özəl sektor tərəfindən investisiya qoyulması, kommunikasiya xətlərinin, elektrik və qaz xətlərinin isə dövlət tərəfindən çəkilməsi nəzərdə tutulub. İlk belə layihə azad olunmuş ərazilərdə, Cəbrayıl rayonunda qurulmuş Araz Vadisi Sənaye Zonasının qarşısında həyata keçirilir. Bunun məqsədi də məhz emal sənayesinin orada qurulması imkanlarının və potensialının olmasıdır".

Nazir qeyd edib ki, eyni zamanda, ərazinin Zəngəzur dəhlizi yolu üzərində yerləşməsi gələcəkdə məhsul ixracını logistik baxımdan daha da asanlaşdıracaq.

M. Məmmədov həmçinin vurğulayıb ki, aqrar sahədə dronların tətbiqi də genişləndiriləcək: "Dron tətbiqi ölkədə yenidir. Əlbəttə ki, həm fermerlərin, həm də şirkətlərin buna alışması lazımdır. Dronların tətbiqi hazırda nəzarətli şəkildə həyata keçirilir. Düşünürük ki, inkişaf səviyyəsi artdıqca və onun daha yaxın tətbiqi dəqiqləşdikcə, dronların istifadəsi genişlənəcək. Nazirlik və Aqrar İnnovasiya Mərkəzi olaraq dron operatorlarının yetişdirilməsi, aqrar sahədə dronların istifadəsi üzrə təlimlər keçirməyə davam edirik".

Oxşar xəbərlər

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Şuşada "Xarıbülbül" IX Beynəlxalq Musiqi Festivalı keçirilir

Cəbrayılın Horovlu kəndində Novruz festivalı keçirilib

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında iştirak edib

Neftçalada rayonunda "I Balıq" Festivalı keçirilib