Gələn ay Azərbaycanda keçiriləcək Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasında (COP29) iştirak edəcək bəzi şəxslər qonaqlama yerləri üçün depozit verməyə bilər.

“Report”un əldə etdiyi məlumata görə, bu, Milli Məclisin oktyabrın 8-də keçiriləcək plenar iclasının gündəliyinə daxil edilən “Azərbaycan Respublikası Hökuməti ilə Birləşmiş Millətlər Təşkilatının İqlim Dəyişmələri üzrə Çərçivə Konvensiyasının, Kioto Protokolunun və Paris Sazişinin Katibliyi arasında Birləşmiş Millətlər Təşkilatının İqlim Dəyişmələri üzrə Çərçivə Konvensiyasının Tərəflər Konfransının iyirmi doqquzuncu sessiyası, Kioto Protokolunun Tərəflər Görüşünün on doqquzuncu sessiyası, Paris Sazişinin Tərəflər Görüşünün altıncı sessiyası və Köməkçi Orqanların sessiyaları haqqında Saziş”in təsdiq edilməsi barədə qanun layihəsində əksini tapıb.

Belə ki, Azərbaycan hökuməti iştirakçılar üçün münasib kommersiya qiymətlərə hotel və yaşayış sahələri də daxil olmaqla, adekvat və asanlıqla əlçatan qonaqlama yerləri təşkil edəcək.

Eyni zamanda inkişaf etməkdə olan ölkələrdən olan iştirakçıların tədbirdə asan iştirakını təmin etmək üçün qonaqlama qiymətlərinin adi bazar şərtlərindən kənara çıxılmaması təmin ediləcək.

Bundan başqa, inkişaf etməkdə olan ölkələrdən olan iştirakçılar ağlabatan müddət ərzində xahiş əsasında depoziti qabaqcadan vermək iqtidarında olmasalar belə qonaqlama yerlərində qala biləcəklər.

Qeyd edək ki, beynəlxalq tədbir noyabr ayının 11-22 noyabr tarixlərində Bakı Olimpiya Stadionunda keçiriləcək.

Oxşar xəbərlər

Azərbaycan COP29-un maliyyə öhdəlikləri ilə yanaşı digər faktiki əlavə xərcləri öz üzərinə götürür

XİN başçısı BMT BA-nın 79-cu sessiyasında çıxış edib - YENİLƏNİB

“Dövlət informasiya ehtiyatlarının və sistemlərinin Nümunəvi Əsasnaməsi” təsdiq edilib

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

“COP29 üçün effektiv kommunikasiya strategiyaları” mövzusunda media seminarı keçirilib - YENİLƏNİB