Son günlər ölkənin dağlıq və dağətəyi ərazilərində müşahidə olunan intensiv yağıntılar nəticəsində Bakı–Şamaxı–Yevlax avtomobil yolunun Ağsu aşırımından keçən hissəsində torpaq sürüşməsi yenidən aktivləşib.

Bu barədə "Report"un Yuxarı Şirvan bürosunun sorğusuna cavab olaraq Azərbaycan Avtomobil Yolları Dövlət Agentliyindən (AAYDA) bildirilib.

Qeyd olunub ki, sürüşmə nəticəsində yolun 147-ci kilometrliyində asfalt örtüyündə çatlar və çökmələr yaranıb:

"Dövlət Agentliyi tərəfindən ərazidə əlavə təhlükəsizlik tədbirləri görülüb. Təhlükəli hissəyə xəbərdaredici nişanlar quraşdırılıb, sahə xüsusi lentlərlə işarələnib və nəqliyyat vasitələrinin hərəkəti digər zolaq vasitəsilə ikitərəfli qaydada təşkil olunub. Ərazi tərəfimizdən nəzarətdə saxlanılır".

Vurğulanıb ki, hadisə ilə bağlı əraziyə mütəxəssislər cəlb olunub, baxış keçirilib, problemin aradan qaldırılması üçün müvafiq təkliflər hazırlanaraq aidiyyəti qurumlara təqdim ediləcək. Maliyyə vəsaiti ayrıldıqdan sonra ərazidə bərpa işlərinə başlanılması nəzərdə tutulur.

11:45

Ağsu aşırımında torpaq sürüşməsi baş verib.

"Report"un Yuxarı Şirvan bürosu xəbər verir ki, sürüşmə Bakı–Şamaxı–Yevlax avtomobil yolunun 147-ci kilometrliyində qeydə alınıb.

Sürüşmə nəticəsində asfalt örtüyündə dərin çatlar, çökmələr əmələ gəlib. Yolun mühafizə zolağı və çiyin hissəsi tamamilə yararsız vəziyyətə düşüb. Hazırda nəqliyyat vasitələrinin hərəkəti müvəqqəti olaraq bir zolaq üzrə təşkil edilib. Bu isə dumanlı havada tıxaca və təhlükəli vəziyyətin yaranmasına səbəb olur.

Aidiyyəti qurumlar tərəfindən əraziyə xəbərdaredici nişanlar yerləşdirilib, təhlükəli hissə xüsusi lentlərlə işarələnib. Yol polisi əməkdaşları tərəfindən hərəkətə nəzarət edilir, sürücülərə sürət həddini minimuma endirmək və ehtiyatlı olmaq tövsiyə olunur.

Məsələ ilə bağlı 4 saylı Yol-istismar idarəsinin baş mühəndisi Həsən Məmmədli "Report"un yerli bürosuna bildirib ki, hazırda əraziyə geoloqlar cəlb olunub və sürüşmənin baş verməsinin dəqiq səbəbləri araşdırılır. Araşdırmadan sonra ərazidə təmir-bərpa işlərinə başlanılacaq.

Qeyd edək ki, sözügedən ərazidə ötən ilin yaz aylarında da torpaq sürüşməsi baş vermişdi və həmin vaxt yola asfalt örtüyü salınaraq çətinlik aradan qaldırılmışdı.

Oxşar xəbərlər

Ağsu dolaylarındakı son durum: Sürüşmə riskini azaltmaq üçün tədbirlər görülür

Ağsu dolaylarında TORPAQ SÜRÜŞMƏSİ: Yol qismən BAĞLANDI - FOTO

Horadiz–Cəbrayıl–Zəngilan–Ağbənd yolunun tikintisi 95 % icra olunub

Qubada torpaq sürüşməsi baş verən kəndə ərzaq yardımı göndərilib

Prezident İlham Əliyev Yevlax Olimpiya İdman Kompleksinin açılışında iştirak edib