Mingəçevirdə keçirilən V "Cyber Summer School 2026" yay düşərgəsinin iştirakçıları kibertəhlükəsizliyin əsas istiqamətləri barədə məlumatlandırılıb.

"Report"un Qərb bürosunun məlumatına görə, təlim iştirakçıları "Blue Team" (Azərbaycan dilində tədris) və "Red Team" (ingilis dilində tədris) qruplarında kibertəhlükəsizlik sahəsinin əsas istiqamətlərini əhatə edən nəzəri və praktiki məşğələlərdə iştirak ediblər.

Hər iki qrup üçün "Şəbəkə təhlükəsizliyi/Network Security", "Veb tətbiqlərinin təhlükəsizliyi/Web Application Security", "Kibertəhlükəsizlik məqsədli skript yazılması/Scripting for Security" və "Əməliyyat sistemlərinin təhlükəsizliyi/Operating System Security" mövzuları üzrə təlimlər davam etdirilib.

Təlimlər Azərbaycan Kibertəhlükəsizlik Təşkilatları Assosiasiyasının (AKTA) platin üzvü olan "Azercell Telekom" MMC-nin Kibertəhlükəsizlik mühəndisi Səfərli Səfərəli və Dövlət Təhlükəsizliyi Xidmətinin (DTX) Milli Kibertəhlükəsizlik Mərkəzinin əməkdaşları tərəfindən aparılıb. Təlimlər zamanı iştirakçılar şəbəkələrin təhlükəsizliyinin təmin olunması prinsipləri, veb tətbiqlərində rast gəlinən təhlükəsizlik boşluqları və onların aradan qaldırılması üsulları, kibertəhlükəsizlik məqsədli skriptlərin hazırlanması, eləcə də əməliyyat sistemlərinin təhlükəsizliyinin təmin edilməsinə dair nəzəri biliklər əldə edib, praktiki tapşırıqları yerinə yetirərək mövzular üzrə bacarıqlarını inkişaf etdiriblər.

Günün sonunda iştirakçıların təlim müddətində əldə etdikləri biliklərin qiymətləndirilməsi və möhkəmləndirilməsi məqsədilə interaktiv viktorina təşkil olunub.

Qeyd edək ki, iyulun 6-da başlayan V "Cyber Summer School 2026" kiber yay düşərgəsinin əsas məqsədi ölkədə kibertəhlükəsizlik sahəsində peşəkar insan kapitalının inkişafına töhfə vermək, gənclərin nəzəri bilik və praktiki bacarıqlarını gücləndirməkdir.

Düşərgə çərçivəsində növbəti günlərdə də kibertəhlükəsizliyin müxtəlif istiqamətləri üzrə nəzəri və praktiki təlimlər, komanda tapşırıqları, kiber yarışlar və digər inkişafyönümlü fəaliyyətlər davam etdiriləcək.

Tədbir iyulun 11-dək davam edəcək.

Oxşar xəbərlər

Maşın qiymətinə olan telefon nömrələri satışa çıxarıldı - SİYAHI

Prezident İlham Əliyev Bakının İslam Səfərli küçəsinin yenidənqurmadan sonra açılışında iştirak edib

"Cyber Summer School 2026"nın təlim proqramına start verilib

Mingəçevirdə V "Cyber Summer School 2026" kiber yay düşərgəsinə start verilib

Leyla Əliyeva Mingəçevirdə ekoloji aksiyalarda iştirak edib