Azərbaycanın Mərkəzi Asiya ölkələrinin məşvərət görüşləri formatına qoşulması qarşılıqlı əlaqəni keyfiyyətcə yeni makroregional səviyyəyə çıxarır.

"Report"un Çolpon-Ataya ezam olunmuş əməkdaşı xəbər verir, bu barədə Özbəkistan Prezidenti Şavkat Mirziyoyev "Mərkəzi Asiya – Azərbaycan" qeyri-rəsmi məşvərət görüşündə bildirib.

"Qarşımızda Mərkəzi Asiyanı, Cənubi Qafqazı və yaxın qonşumuz Əfqanıstanı birləşdirəcək vahid inkişaf məkanı formalaşdırmaq üçün tarixi imkan açılır. Bu məqamdan tam şəkildə istifadə etmək və Avrasiyanın düz mərkəzində davamlı inkişaf, qarşılıqlı əlaqəlilik və mehriban qonşuluq üçün birgə səylərlə möhkəm əsaslar yaratmaq lazımdır", - o bildirib.

Prezident xatırladıb ki, hazırkı görüş Mərkəzi Asiya ölkələrinin müstəqilliyinin 35 illiyinin qeyd olunması ərəfəsində keçirilir: "Bu illər ərzində hər bir respublika dövlətçiliyin təşəkkülü, iqtisadi yüksəliş və milli dirçəlişin öz unikal yolunu keçib. Birgə səylər sayəsində Mərkəzi Asiya ümumi inkişaf məqsədi naminə birləşir. Bununla yanaşı, mürəkkəb və gözlənilməz reallıq bizdən qətiyyətli addımlar və daha sıx koordinasiya tələb edir".

Ş.Mirziyoyev, həmçinin vurğulayıb ki, Mərkəzi Asiya təhsil, elm və innovasiya üzrə rəqabətədavamlı haba çevrilməlidir. O bildirib ki, buna tam infrastrukturun yaradılması vasitəsilə nail olmaq mümkündür.

Eyni zamanda, Ş.Mirziyoyev iqlim dəyişikliyinə qarşı birgə həll yolu tapmağa çağırıb və əlavə edib ki, anomal istilər iqtisadiyyata və sağlamlığa təsir göstərən amilə çevrilir.

Oxşar xəbərlər

İlham Əliyev Türküstanda TDT-nin qeyri-rəsmi Zirvə görüşündə iştirak edib

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında iştirak edib

Çolpon-Ata şəhərində Azərbaycan və Mərkəzi Asiya ölkələrinin dövlət başçılarının qeyri-rəsmi görüşü keçirilib

Prezident İlham Əliyev Bakı Enerji Həftəsinin rəsmi açılış mərasimində iştirak edib

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib