Azərbaycanın qadınlardan ibarət voleybol millisini Avropa çempionatının 1/8 finalında Türkiyə ilə oyunda çətin sınaq gözləyir.

Bu barədə "Far.Az" açıqlamasında yığmanın sabiq kapitanı Alla Həsənova deyib.

Onun sözlərinə görə, hər qarşılaşmaya motivasiya və inamla çıxmaq lazımdır:

"Qarşıda bizi daha çətin mərhələ gözləyir. 1/8 finalda Türkiyə millisi ilə qarşılaşacağıq. Türkiyə bu gün həm Avropanın, həm də dünyanın ən güclü komandalarından biridir. Həm də oyun Türkiyədə keçiriləcək. Ona görə də Azərbaycan millisini çox çətin sınaq gözləyir. Amma bu, idmandır. Hər oyuna böyük motivasiya və inamla çıxmaq lazımdır. Qızlara uğurlar arzulayıram. İnanıram ki, onlar meydanda əllərindən gələni və Azərbaycanı layiqincə təmsil edəcəklər".

A.Həsənova Azərbaycanın C qrupunun oyunlarına ev sahibliyi etdiyini xatırladıb:

"Milli komanda Bakıda 5 oyun keçirdi və bunların 3-də qələbə qazanaraq qrupu üçüncü pillədə başa vurdu. Fikrimcə, qrup mərhələsini keçmək komandanın qarşısına qoyulan əsas hədəflərdən biri idi və milli bunu bacardı. Bakıdakı oyunlar da kifayət qədər maraqlı və gərgin mübarizə şəraitində keçdi. Qrupdakı Belçika və Niderland həqiqətən ən güclü komandalar sırasındadır. Amma Azərbaycan millisi onlara qarşı da çox yaxşı mübarizə apardı. Hətta həmin oyunlarda komandamızın qələbə qazanmaq şansları da var idi. Sadəcə, bəzi məqamlarda üstünlüyü rəqibə verdik".

Xatırladaq ki, Türkiyə - Azərbaycan oyunu sentyabrın 1-də İstanbulda baş tutacaq.

Oxşar xəbərlər

Alla Puqaçova ilə 11 il yaşadığı evi 240 milyona satır

İlham Əliyevin iştirakı ilə İslam İnkişaf Bankı Qrupunun 2026-cı il üzrə İllik Toplantılarının açılış mərasimi keçirilib

FHN şagird və müəllimlərlə təlim keçirdi

Leyla Əliyeva "Mənzərəyə açılan ev" mövzusunda qrup sərgisində iştirak edib

FHN cəzaçəkmə müəsisəsində təlim keçirdi