Keçmiş Yuqoslaviya Sosialist Federativ Respublikasının (YSFR) Rəyasət Heyətinin 10-cu sədri Raif Dizdareviç 100 yaşında Sarayevoda vəfat edib.

"Far.Az"un Balkan bürosu xəbər verir ki, 1926-cı il dekabrın 9-da Foynitsada anadan olan Dizdareviç 1943-cü ildə Milli Azadlıq Mübarizəsinə qoşulub, 1945-ci ildə isə Yuqoslaviya Kommunist Partiyasının üzvü olub.

O, karyerasına dövlət təhlükəsizlik orqanlarında başlayıb, Xalqın Müdafiəsi və Dövlət Təhlükəsizlik idarələrində çalışıb. 1951-ci ildə isə Yuqoslaviya Federativ Xalq Respublikasının diplomatik xidmətinə keçib.

Uzunmüddətli diplomatik fəaliyyəti dövründə Dizdareviç Bolqarıstan, Sovet İttifaqı və Çexoslovakiyadakı səfirliklərdə çalışıb, 1972-ci ildə Federal Xarici İşlər katibinin müavini vəzifəsinə təyin olunub. Daha sonra 1978–1982-ci illərdə Bosniya və Herseqovina Sosialist Respublikasının Rəyasət Heyətinin sədri, 1982–1984-cü illərdə isə YSFR Assambleyasının sədri vəzifələrində çalışıb.

1984–1987-ci illərdə Federal Xarici İşlər katibi vəzifəsini tutan Dizdareviç daha sonra YSFR Rəyasət Heyətinin üzvü olub və 15 may 1988-ci ildən 15 may 1989-cu ilədək onun sədri vəzifəsində çalışıb.

Aktiv siyasi fəaliyyətdən təqaüdə çıxdıqdan sonra Sarayevoda yaşayan Dizdareviç "Titonun ölümündən Yuqoslaviyanın ölümünədək" və "Xatırlanacaq zamanlar" adlı xatirə kitabları da daxil olmaqla, bir sıra əsərlər yazıb.

Qeyd edək ki, o, Yuqoslaviyanın ilk boşnak müsəlman sədri olub.

Oxşar xəbərlər

Prezident İlham Əliyev Əfv Sərəncamı imzalayıb

AMEA-nın Rəyasət Heyətinin "gərgin" iclası

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

"Global Media Group" "Xəzəri qoruyaq" ekoloji aksiyasına qoşulub

Şəhidlər xiyabanına xalq ziyarəti axşam saatlarında da davam edir