Fransa Prezidenti Emmanuel Makron ölkədə baş verən etiraz aksiyalarında zorakılıq hallarından sonra bəzi nümayişlərin qadağan edilə biləcəyini açıqlayıb. Ölkə üzrə aksiyalar zamanı təxminən 2 400 nəfər saxlanılıb, 1 000-ə yaxın polis, jandarm və yanğınsöndürən xəsarət alıb. Parisdə isə bir nümayişçi həyatını itirib.

BAKU.WS xəbər verir ki, Makron oktyabrın 17-də "Sarı jiletlilər" hərəkatının təşkil etdiyi aksiyalardan sonra Yelisey sarayından xalqa müraciət edib.

Fransa prezidenti ölkənin sabitliyə və sakitliyə ehtiyacı olduğunu vurğulayaraq, şəhərlərdə asayişi qorumaq üçün prefektlərin bəzi nümayişləri qadağan edə biləcəyini bildirib.

Makronun sözlərinə görə, aksiyalar zamanı bir sıra mağazalar talan edilib, ictimai və bələdiyyə binalarına hücumlar olub. O, zorakılıq törədən şəxslərin məsuliyyətə cəlb edilməli, dəymiş zərərin isə təqsirkarlar tərəfindən ödənilməli olduğunu qeyd edib.

Prezident eyni zamanda həyat bahalılığı və yanacağın yüksək qiymətlərindən narazı olan etirazçıların narahatlığını başa düşdüyünü bildirib. O, hökumətin sahibkarlara dəstək tədbirləri hazırlayacağını və baş nazir Sebastyan Lekornünün böhranla bağlı müşavirə keçirəcəyini açıqlayıb.

Qeyd edək ki, "Sarı jiletlilər" hərəkatının tərəfdarları oktyabrın 17-də həyat bahalılığına və yanacağın qiymətinə etiraz olaraq ölkənin müxtəlif şəhərlərində aksiyalar keçiriblər. Parisdə bir nümayişçi özünü pis hiss etdikdən sonra həyatını itirib, Sent-Etyen şəhərində isə başqa bir etirazçının əli qopub.

Oxşar xəbərlər

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Avropanın 6 ölkəsində Ermənistanı sorğulayan aksiyalar təşkil edilib

"Fəvvarələr meydanı"nda TƏLİM - Yanğınsöndürən maşınlar sərbəst hərəkət edə bilmədi

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Dərnəgüldə yanan obyektin yaxınlığındakı mağazalar təxliyə edilir