Rusiya və Ukrayna arasında ABŞ-nin vasitəçiliyi ilə növbəti danışıqların keçirilməsi planlaşdırılır. Görüşlərin noyabrın 10-11-də Birləşmiş Ərəb Əmirliklərinin paytaxtı Əbu-Dabidə baş tutacağı gözlənilir.

Far.Az xəbər verir ki, bu barədə ABŞ Prezidenti Donald Trampın xüsusi nümayəndəsi Stiv Uitkoff məlumat verib.

Onun sözlərinə görə, Vaşinqton tərəflər arasında işçi səviyyəsində keçiriləcək müzakirələrə vasitəçilik edəcək. Uitkoff bildirib ki, məqsəd əvvəlki görüşlər zamanı əldə olunmuş irəliləyişi davam etdirərək uzunmüddətli və hərtərəfli sülh razılaşmasına nail olmaqdır.

Xüsusi nümayəndə qeyd edib ki, ABŞ nümayəndələri bu həftə Brüsseldə Fransa, Almaniya, Böyük Britaniya, Avropa İttifaqı və NATO təmsilçiləri ilə də görüşəcəklər. Müzakirələrin əsas mövzusu Ukrayna üçün təhlükəsizlik təminatları olacaq.

Bundan başqa, danışıqlarda münaqişə başa çatdıqdan sonra Avropanın təhlükəsizlik sisteminin gələcək quruluşu və Ukraynanın bərpasına dəstək məqsədilə iqtisadi imkanlar da müzakirə ediləcək.

Qeyd edək ki, Əbu-Dabidə keçiriləcək görüşlərdə ABŞ-ni Stiv Uitkoff və Donald Trampın kürəkəni Cared Kuşner təmsil edəcəklər.

Rusiya Prezidentinin beynəlxalq investisiya və iqtisadi əməkdaşlıq üzrə xüsusi nümayəndəsi, Rusiya Birbaşa İnvestisiyalar Fondunun rəhbəri Kirill Dmitriyev də gözlənilən görüşlərə münasibət bildirib. O, ABŞ Prezidenti Donald Trampın və komandasının sülh təşəbbüslərinin beynəlxalq ictimaiyyət tərəfindən yüksək qiymətləndirildiyini vurğulayıb.

Xatırladaq ki, oktyabrın 21-də Rusiya Prezidenti Vladimir Putin Sankt-Peterburqda Stiv Uitkoffla görüşüb. Görüşə Donald Trampın kürəkəni Cared Kuşner də onlayn formatda qoşulub. Təxminən üç saat davam edən müzakirələrdə Ukrayna münaqişəsinin həlli məsələsi diqqət mərkəzində olub.

Kremlin sözçüsü Dmitri Peskov görüşü "məzmunlu" kimi xarakterizə edib. Həmin görüş zamanı Uitkoff Rusiya, ABŞ və Ukrayna arasında danışıqların yenidən başlanacağına ümid etdiyini bildirib. O, həmçinin Ukrayna münaqişəsinin nizamlanmasına dair yanaşmaları əks etdirən sənədləri Putinə təqdim edib.

Oxşar xəbərlər

Azərbaycanın və BƏƏ prezidentləri Əbu-Dabidə "Sülh Qalxanı – 2026" birgə əməliyyat-taktiki təlimini izləyiblər

Əbu-Dabidə Azərbaycan Prezidenti İlham Əliyevin Birləşmiş Ərəb Əmirliklərinin Prezidenti ilə görüşü olub

ABŞ Prezidenti Donald Trampın təşəbbüsü ilə yaradılan Sülh Şurası təsis edilib

Leyla Əliyeva Luvr Əbu-Dabi muzeyini və İbrahim Ailə Evini ziyarət edib

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3