Özbəkistan Prezidenti Şavkat Mirziyoyev Tokioda "Mərkəzi Asiya+Yaponiya" dialoqunun birinci sammitində iştirak edib və çoxtərəfli əməkdaşlığın daha da inkişafı üçün bir sıra təşəbbüslər irəli sürüb.

"Report" xəbər verir ki, bu barədə Özbəkistan Prezidentinin mətbuat xidməti məlumat yayıb.

Ş.Mirziyoyev "Mərkəzi Asiya-Yaponiya 2040" əməkdaşlıq strategiyasının hazırlanmasını təklif edib.

O qeyd edib ki, bu strategiyaya regionun davamlı inkişafına və qlobal iqtisadi proseslərə daha dərin inteqrasiyasına yönəlmiş konkret proqram və layihələr daxil edilməlidir.

Özbəkistan lideri uzunmüddətli əməkdaşlıq gündəliyinin formalaşdırılması üçün aparıcı analitik mərkəzlərin iştirakı ilə ekspert forumunun təsis edilməsini təklif edib və Daşkəndin bu forumun ilk iclasına ev sahibliyi etməyə hazır olduğunu vurğulayıb.

Ticarət-iqtisadi əməkdaşlığa toxunan Ş.Mirziyoyev Yaponiyanın maliyyə qurumlarının artan dəstəyini alqışlayıb. O, Mərkəzi Asiyanın təbii və insan resurslarının Yaponiyanın sənaye və texnoloji potensialı ilə birləşdirilməsinin sinerji yaradacağına əminliyini ifadə edib. Bu baxımdan prezident Mərkəzi Asiyada İnfrastruktur və Sənayenin İnkişafı üçün İnvestisiya Fondunun, eləcə də Yaponiya Texnologiya Parklarının Mərkəzi Asiya şəbəkəsinin yaradılmasını təklif edib.

Özbəkistan Prezidenti həmçinin "Mərkəzi Asiya-Yaponiya" Rəqəmsal Mərkəzinin yaradılmasını təklif edib. Bu platforma süni intellekt, əşyaların interneti və kibertəhlükəsizlik sahəsində layihələri birləşdirə bilər.

Ş.Mirziyoyev regionun tranzit-logistika infrastrukturunun inkişafına, o cümlədən sürətli dəmir və avtomobil yollarının, hava limanlarının və logistika mərkəzlərinin tikintisinə Yaponiya investisiyaları və texnologiyalarının cəlb edilməsində maraqlı olduqlarını bildirib.

Sammitin yekunları üzrə Tokio Bəyannaməsi qəbul edilib.

Mərkəzi Asiya ölkələrinin dövlət başçıları və Yaponiyanın Baş naziri növbəti sammitin Qazaxıstanda keçirilməsi qərarına gəliblər.

Oxşar xəbərlər

Bakıda D-8 ölkələrinin Gənclər Dialoqunun rəsmi açılış mərasimi keçirilib

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib

Prezident İlham Əliyev Yaxın Şərq Sülh Sammitində iştirak edib

İlham Əliyev Cəbrayılın Horovlu kəndinin birinci mərhələsinin açılışında iştirak edib

Prezident İlham Əliyev XII Qlobal Bakı Forumunun açılış mərasimində çıxış edib