Hava limanları və digər dövlət sərhədindən buraxılış məntəqələrində meymunçiçəyi virusunun ölkəyə sirayət etməsinin qarşısının alınması məqsədilə Dövlət Gömrük Komitəsi (DGK) tərəfindən bir sıra tədbirlər həyata keçirilir.

Bu barədə Dövlət Gömrük Komitəsindən məlumat verilib.

"Ümumdünya Səhiyyə Təşkilatının məlumatları əsasında meymunçiçəyinə görə riskli ölkələr müəyyən edilib və həmin ölkələrdən gələn sərnişinlərə xüsusi diqqət yetirilir. DGK-nın Tibbi Xidmət İdarəsi tərəfindən sərhəd buraxılış məntəqələrində gömrük əməkdaşlarına xüsusi təhlükəli infeksiyalarla bağlı maarifləndirici təlimlər mütəmadi olaraq keçirilir. Son dövrlərdə isə meymunçiçəyinin klinik əlamətləri, yoluxma yolları və profilaktikası mövzularına xüsusi diqqət yetirilir.

Hava limanları və digər sərhəd buraxılış məntəqələrində hərarəti yüksək olan sərnişinlərin aşkar edilməsi üçün mövcud texniki imkanlardan istifadə edilir. Xəstəliyə şübhəlilərin ilkin tibbi baxışı və epidemioloji sorğusu ilə əlaqədar hazırlıq səviyyəsi artırılıb. Xəstəliyə şübhəli şəxslər aşkar edilərsə, növbəti addımlar Azərbaycan Respublikası Səhiyyə Nazirliyi, Tibbi Ərazi Bölmələrini İdarəetmə Birliyi (TƏBİB) və müvafiq qurumlarla birgə "Azərbaycan Respublikasının gömrük-sərhəd buraxılış məntəqələrində xüsusi təhlükəli infeksiyalara qarşı əks-epidemik tədbirlərə dair Təlimat"a əsasən həyata keçiriləcək" , - məlumatda qeyd edilir.

Qeyd edək ki, bir neçə gün əvvəl Səhiyyə Nazirliyinin mütəxəssisi Təyyar Eyvazov meymunçiçəyi virusunun laboratoriya müayinəsi üçün testlər və xəstəliyə qarşı lazımi dərman preparatlarının ölkəyə gətirildiyini bildirmişdi.

Oxşar xəbərlər

DGK: Meymunçiçəyi virusuna qarşı tədbirlər gücləndirilib

Gömrük Komitəsi: Meymunçiçəyi virusuna qarşı gücləndirilmiş tədbirlər həyata keçirilir

Azərbaycan Sərhəd Mühafizəsinin yaranmasından 105 il ötür

Azərbaycana meymunçiçəyi testləri və xəstəliyə qarşı lazımi dərman preparatları gətirilib

Meymunçiçəyi virusu nədir, necə yayılır, COVID kimi pandemiyaya səbəb ola bilərmi?