Kənd Təsərrüfatı Nazirliyi yanında Aqrar Xidmətlər Agentliyi tərəfindən ölkənin fitosanitar təhlükəsizliyinin təmin olunması, zərərli orqanizmlərin yayılmasının qarşısının alınması və kənd təsərrüfatı məhsullarının qorunması məqsədilə məhsul saxlanma məntəqələrində və karantin nəzarətində olan müxtəlif materiallarda fumiqasiya (zərərsizləşdirmə) tədbirləri davam etdirilir.

"Report"un Şimal bürosunun məlumatına görə, "Fitosanitar nəzarəti haqqında" qanuna uyğun olaraq karantin nəzarətində olan materialların zərərsizləşdirilməsi hüquqi və fiziki şəxslərlə bağlanılmış müqavilələr əsasında Agentlik tərəfindən həyata keçirilir.

Bu işlər Agentliyin xüsusi təlimatlandırılmış və müvafiq səlahiyyət verilmiş peşəkar fumiqasiya dəstələri tərəfindən icra olunur.

Cari ilin əvvəlindən bu günədək fiziki və hüquqi şəxslərin müraciətləri əsasında 192 951,172 ton dənli və paxlalı bitki məhsulları, yemlər, texniki yüklər, qurudulmuş meyvələr, həmçinin tütün, pambıq, biyan və digər karantin nəzarətində olan materiallar zərərsizləşdirilib.

Eyni zamanda, 84 490,542 m³ həcmində meşə materiallarında, o cümlədən taxta altlıqlar (paletlər) və digər taxta qablaşdırma materiallarında fumiqasiya tədbirləri aparılıb.

Məhsulların təhlükəsiz saxlanılmasının təmin edilməsi məqsədilə 138 507,326 m³ həcmində saxlanma yerləri və anbar sahələri zərərsizləşdirilib.

Tədbirlər çərçivəsində karantin nəzarətində olan məhsul və materiallarda aşkar edilən zərərli orqanizmlərə qarşı maye, bərk və qaz formalı pestisidlərdən istifadə olunmaqla zərərsizləşdirmə işləri həyata keçirilir.

Fumiqasiya tədbirləri məhsulların keyfiyyətinin qorunmasına, məhsul itkilərinin minimuma endirilməsinə və bitki sağlamlığının təmin olunmasına xidmət edir.

Qeyd edilib ki, fumiqasiya prosesinin bütün mərhələlərində təhlükəsizlik qaydalarına ciddi riayət olunur. Tədbirlərin həyata keçirilməsi zamanı insan və heyvan sağlamlığı, eləcə də ətraf mühitin mühafizəsi ilə bağlı tələblər nəzərə alınır, tətbiq olunan preparatların təhlükəsiz istifadəsinə xüsusi diqqət yetirilir.

Bununla yanaşı, fermerlərə və sahibkarlara fumiqasiya tədbirlərinin əhəmiyyəti, tətbiq olunan prosedurlar və təhlükəsizlik qaydaları barədə müvafiq məlumatlar verilir.

Oxşar xəbərlər

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Uşaqların zərərli informasiyadan qorunmasına yönəlmiş normativ hüquqi akt layihəsi müzakirə olunub

Lökbatandakı yanğına helikopterlər indiyədək 200 ton su töküb - YENİLƏNİB-4

Lökbatandakı yanğına helikopterlər indiyədək 150 ton su töküb - YENİLƏNİB-4

Qarabağ və Şərqi Zəngəzurda torpaq icarəsinə dair yeni müqavilələr imzalanıb