Şimali Makedoniyanın Yunanıstanla yeni qaz interkonnektoru tam şəkildə hidrogen daşınmasına uyğun olaraq layihələndirilib.

"Report"un Balkan bürosu xəbər verir ki, bu məsələ Şimali Makedoniyanın hazırladığı ilk milli Hidrogen Araşdırmasında ətraflı şəkildə əks olunub.

Qeyd edilib ki, ölkə gələcəyin Avropa hidrogen infrastrukturunda öz mövqeyini möhkəmləndirməyə hazırlaşır. Avropa İttifaqının texniki yardımı ilə Şimali Makedoniyanın Energetika, Mədənçilik və Mineral Ehtiyatlar Nazirliyinin həyata keçirdiyi bu tədqiqat Serbiya ilə qaz bağlantısının yaradılması layihəsi çərçivəsində işlənib hazırlanıb.

Tədqiqat təsdiqləyib ki, Şimali Makedoniya hidrogen iqtisadiyyatını mərhələli şəkildə formalaşdırmaq və gələcək Avropa hidrogen infrastrukturunun aktiv tərkib hissəsinə çevrilmək baxımından real imkanlara sahibdir.

Sənəddə göstərilir ki, ölkə Serbiya və Yunanıstanla birgə Pan-Avropa Hidrogen Şəbəkəsi və Avropa Hidrogen Magistralı kontekstində strateji əhəmiyyətli coğrafi mövqeyə malikdir. Sözügedən şəbəkə gələcəkdə təmiz hidrogenin beynəlxalq sərhədlər arasında ötürülməsi məqsədilə yaradılacaq Avropa miqyaslı infrastrukturdur.

Xüsusi olaraq diqqətə çatdırılır ki, Serbiya ilə planlaşdırılan qaz interkonnektoru üçün layihəçi və podratçının müəyyənləşdirilməsinə dair tender sənədlərində həmin boru kəmərinin də 100 % hidrogen ötürülməsinə tam yararlı olması şərt kimi nəzərdə tutulub.

Bu araşdırmanın hazırlanması sayəsində Şimali Makedoniya hidrogen sahəsinin inkişafına dair strateji sənədə malik olan regiondakı az sayda ölkələrdən birinə çevrilib. Sənəddə 2050-ci ilə qədər hidrogenin inkişaf perspektivlərinə dair müəyyən ssenarilər ortaya qoyulub. Bura bərpa olunan enerji qaynaqlarının inteqrasiyası, hidrogen dəhlizlərinin formalaşdırılması, hidrogenin sənaye və nəqliyyat sektorlarında istifadəsi, eləcə də istixana qazı emissiyalarının nəzərəçarpacaq dərəcədə azaldılması imkanlarının qiymətləndirilməsi daxildir.

Oxşar xəbərlər

Prezident İlham Əliyev "AZWOOL" mineral daş yunu zavodunun açılışında iştirak edib

Horadiz-Ağbənd dəmir yolu ilə Araz İqtisadi Zonası Sənaye Parkına yüklərin daşınmasına başlandı

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN