Ermənistanın Ərazi İdarəetməsi və İnfrastruktur Nazirliyi iş adamı, "Güclü Ermənistan" Partiyasının lideri Samvel Karapetyana məxsus "Ermənistan Elektrik Şəbəkələri" QSC-nin milliləşdirilməsi ilə bağlı qanun layihəsi üzrə ictimai dinləmələr keçirib.

BAKU.WS Oxu.Az-a istinadən xəbər verir ki, dinləmələrə nazir David Xudatyan sədrlik edib.

Tədbirdə "Ermənistan Elektrik Şəbəkələri"nin müvəqqəti idarəçisi Romanos Petrosyan, İctimai Xidmətlərin Tənzimlənməsi Komissiyasının üzvü Sergey Aqinyan, energetika sistemi şirkətlərinin rəhbər və nümayəndələri, KİV təmsilçiləri, eləcə də vətəndaşlar iştirak ediblər.

Nazir bildirib ki, qanun layihəsinin əsas məqsədi əhalinin fasiləsiz elektrik enerjisi ilə təmin olunması, sosial və strateji əhəmiyyətli obyektlərin normal fəaliyyətinin davam etdirilməsi, enerji sisteminin sabitliyinin qorunması və istehlakçı hüquqlarının müdafiəsidir.

Nazirliyin məlumatına görə, ictimai dinləmələr zamanı layihə ilə bağlı hər hansı təklif və ya irad səsləndirilməyib.

Xatırladaq ki, 18 iyun 2025-ci ildə "Taşir" şirkətlər qrupunun prezidenti və təsisçisi Samvel Karapetyan hakimiyyəti zorla ələ keçirməyə açıq çağırışlarda ittiham olunaraq saxlanılmışdı. "Taşir" qrupuna Ermənistanda elektrik enerjisinin ötürülməsi və paylanmasını həyata keçirən "Ermənistan Elektrik Şəbəkələri" QSC də daxildir.

Karapetyan əvvəlcə iki aylıq həbs qətimkan tədbiri ilə həbs edilmiş, daha sonra həbs müddəti bir neçə dəfə uzadılmışdı. Bu il yanvarın 18-də isə o, ev dustaqlığına buraxılıb.

Oxşar xəbərlər

Mehriban Əliyeva Vatikanda Müqəddəs Komodilya katakombalarının bərpası layihəsinin açılışında iştirak edib

Prezident Ərəb Koordinasiya Qrupuna üzv qurumların rəhbər şəxslərini qəbul edib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Bakıda WUF13-ün açılış mərasimi keçirilir, Prezident İlham Əliyev tədbirdə çıxış edib

Leyla Əliyeva və Alyona Əliyeva mükafatlandırma mərasimində iştirak ediblər