Uşaqlıq dövründə kənd mühitində, xüsusilə də inəklərlə təmasda olan uşaqlarda allergiya və astma xəstəliklərinin yaranma riski daha aşağı olur.

Far.Az xəbər verir ki, bu nəticə Münhen Universitet Klinikası və Helmholts İnstitutunun alimlərinin apardığı araşdırmada ortaya çıxıb. Tədqiqatın nəticələri NEJM Evidence elmi jurnalında dərc olunub.

Araşdırma çərçivəsində Avropanın kənd təsərrüfatı bölgələrində yaşayan mindən çox uşağın məlumatları təhlil edilib. Alimlər burun yaxmaları, ev tozu və inək tövlələrindən götürülən toz nümunələrini genetik və metabolik üsullarla araşdırıblar. Nəticələr Fransa və Finlandiyadan əldə olunan məlumatlarla da təsdiqlənib.

Mütəxəssislər müəyyən ediblər ki, əsas qoruyucu rol inəklərin həzm sistemində yaşayan bəzi bakteriyalara məxsusdur. Onların arasında Romboutsia timonensis və Glutamicibacter arilaitensis növləri xüsusi əhəmiyyət daşıyır.

Araşdırmaya görə, bu mikroorqanizmlər astmadan qoruyucu təsirin təxminən üçdə ikisini, ot qızdırması və atopik ekzema riskinin azalmasının isə təxminən yarısını təmin edir.

Alimlər bildiriblər ki, həmin bakteriyalar bioloji aktiv maddələr ifraz edir. Bu maddələr tövlələrdəki toz vasitəsilə havaya yayılır və tənəffüs zamanı immun sisteminin reseptorları ilə qarşılıqlı əlaqəyə girərək allergik iltihab reaksiyalarını zəiflədir.

Tədqiqat müəlliflərinin fikrincə, bu kəşf kənd mühitində böyüyən uşaqlarda immun sisteminin niyə daha davamlı formalaşdığını izah edir. Gələcəkdə isə bu təsiri təqlid edən və kənd təsərrüfatı mühitinə ehtiyac olmadan allergiyadan qorumağa kömək edən preparatların hazırlanması planlaşdırılır.

Oxşar xəbərlər

İlham Əliyev Qarabağ Universitetinin Klinikası binasının açılışında iştirak edib

Həyatda yaxşı şeyləri niyə görmürük? - Tanınmış simaların FİKİRLƏRİ

Leyla Əliyeva və Alena Əliyeva LDU-nun nəzdində yaradılmış Baytarlıq Klinikası ilə tanış olublar

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN