Azərbaycan BMT-nin Beynəlxalq Vergi Əməkdaşlığı üzrə Çərçivə Konvensiyasının hazırlanması məqsədilə keçirilən Hökumətlərarası Danışıqlar Komitəsinin beşinci substantiv sessiyasında təmsil olunub.

"Report" bu barədə İqtisadiyyat Nazirliyi yanında Dövlət Vergi Xidmətinə istinadən xəbər verir.

Məlumata görə, sessiyada ölkəmizi qurumun Beynəlxalq vergitutma və vergi monitorinqi baş idarəsinin rəis müavini, İqtisadi Əməkdaşlıq və İnkişaf Təşkilatının (OECD) ekspert qrupunun üzvü Ceyhun İsmayılov təmsil edib.

Sessiya çərçivəsində vergitutma hüquqlarının dövlətlər arasında ədalətli bölgüsü, qeyri-qanuni maliyyə axınları və zərərli vergi praktikaları ilə mübarizə, eləcə də inkişaf etməkdə olan ölkələrin institusional potensialının gücləndirilməsi məsələləri müzakirə edilib.

Danışıqlarda həmçinin transsərhəd, o cümlədən rəqəmsal xidmətlərdən əldə olunan gəlirlərin vergiyə cəlb edilməsi, vergi mübahisələrinin qarşısının alınması və həlli ilə bağlı ilkin protokol layihələrinə baxılıb. Müzakirələrdə C.İsmayılov praktik və tətbiq oluna bilən qaydaların hazırlanmasının, ikiqat vergitutmanın aradan qaldırılmasının, eləcə də inkişaf etməkdə olan ölkələrə effektiv texniki dəstək göstərilməsinin vacibliyini vurğulayıb.

Yeni beynəlxalq çərçivə hazırlanması inkişaf etməkdə olan ölkələrin qlobal vergi qaydalarının formalaşdırılmasında iştirakına, vergitutma hüquqlarının qorunmasına, ikiqat vergitutma risklərinin azaldılmasına, transfer qiymətlərinin tətbiqində səmərəliliyin artırılmasına və vergi inzibatçılığının gücləndirilməsinə xidmət edir.

Oxşar xəbərlər

Vətən müharibəsində Qələbənin beşinci ildönümünə həsr olunmuş Hərbi parad keçirilib

WUF13-ün beşinci günündən maraqlı anlar - FOTOREPORTAJ

İlham Əliyevin iştirakı ilə İslam İnkişaf Bankı Qrupunun 2026-cı il üzrə İllik Toplantılarının açılış mərasimi keçirilib

Mehriban Əliyeva BMT Baş Assambleyası çərçivəsində xüsusi sessiyada iştirak edib

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib