Şimali Makedoniya 650 milyondan çox istehlakçıya çıxış imkanı yaradır.

"Report" xəbər verir ki, bunu Şimali Makedoniyanın iqtisadiyyat və əmək naziri Besar Durmişi Bakıda keçirilən II Azərbaycan Beynəlxalq İnvestisiya Forumunda (2nd Azerbaijan International Investment Forum – AIIF 2026) bildirib.

Nazirin sözlərinə görə, əsas hədəfləri Şimali Makedoniyanı investorların proqnozlaşdırıla bilənlik, inkişaf etmiş infrastruktur, bazarlara çıxış, peşəkar işçi qüvvəsi və möhkəm institusional dəstək tapa biləcəyi bir məkana çevirməkdir:

"Əsas üstünlüyümüz coğrafi mövqeyimiz və bazar potensialımızdır. Şimali Makedoniya 8-ci və 10-cu dəhlizlərin qovşağında yerləşir ki, bu da istehsal, logistika və müxtəlif bazarlara məhsul paylanması baxımından təbii imkanlar formalaşdırır. Amma bundan da əhəmiyyətlisi odur ki, Şimali Makedoniyada fəaliyyət göstərən investor yalnız daxili bazarla məhdudlaşmır. Ticarət müqavilələri şəbəkəmiz sayəsində biz 650 milyondan artıq istehlakçıya çatmaq imkanı əldə edirik. Bu isə o deməkdir ki, Şimali Makedoniyada həyata keçirilən istehsal daha geniş Avropa və regional bazara yönləndirilə bilər.

Digər mühüm üstünlük sənaye infrastrukturumuzla bağlıdır. Ölkə miqyasında 15 Texnoloji Sənaye İnkişaf Zonasının planlaşdırılması və inkişaf etdirilməsi həyata keçirilir. Bunlardan 8-i hazırda aktiv fəaliyyət göstərir, hazır infrastruktura malikdir və investorların iştirakı təmin olunub. Bu zonalar dövlət dəstəyi, vergi və gömrük güzəştləri, hazır infrastruktur və institusional yardımla investisiya üçün tam bir ekosistemi formalaşdırır.

Bu kontekstdə daha bir əhəmiyyətli məsələni qeyd etmək istərdim: dəstəyimiz investorun ölkəmizə gəlməsi ilə başa çatmır. Biz investorun gəlişindən sonra da fəaliyyətini davam etdirən "aftercare" mexanizmi qurmuşuq. Bu mexanizm çərçivəsində müvafiq qurumlar investisiya həyata keçirildikdən sonra da müəssisələrlə əməkdaşlığı davam etdirir, əməliyyat çətinliklərinin aradan qaldırılmasına, biznesin genişləndirilməsinə və gələcək investisiyalar üçün şəraitin təkmilləşdirilməsinə yardım göstərirlər".

B. Durmişin fikrincə, bu, böyük əhəmiyyət daşıyır, çünki Şimali Makedoniya investorların təkcə gəlməsini deyil, ölkədə fəaliyyətlərini davam etdirmələrini və yenidən investisiya yatırmalarını arzu edir.

"Üçüncü üstünlük avtomobil sənayesində artıq formalaşdırdığımız bazadır. Şimali Makedoniya Avropa avtomobil sənayesinin təchizat zəncirində əhəmiyyətli tərəfdaşa çevrilib, ölkədəki şirkətlər həm Avropa, həm də Türkiyə bazarlarını təmin edirlər. Hökumət olaraq bizim vəzifəmiz sahib olduğumuz bu üstünlükləri daha da proqnozlaşdırıla bilən, effektiv və rəqabətədavamlı biznes mühitinə transformasiya etməkdir. Gələcək dövrdə biz sadəcə daha çox investisiyanın cəlb edilməsini deyil, daha yüksək dəyərli investisiyaları - texnologiya və nou-hau gətirən, daha yaxşı əməkhaqqılı iş yerləri yaradan və yerli təchizat zəncirlərini möhkəmləndirən investisiyaları ölkəyə çəkmək niyyətindəyik".

Oxşar xəbərlər

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Azərbaycanın yeni sənaye modelinin konturları - TƏHLİL

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2