Emin Mahmudov Azərbaycan futbol tarixinə daha bir iz qoyub. O, ötən gün DÇ-2026-nın seçmə mərhələsi çərçivəsində Bakıda keçirilən Azərbaycan – Ukrayna oyununda (1:1) millimizin yeganə qolunun müəllifi olub.

BAKU.WS-in məlumatına görə, bu, Mahmudovun yığmadakı 15-ci qoludur və bununla da o, Qurban Qurbanova məxsus olan 14 qolluq rekordu arxada qoyaraq Azərbaycan millisinin bütün dövrlər üzrə ən məhsuldar futbolçusu adına sahib çıxıb.

Emin Mahmudov 27 aprel 1992-ci ildə Saatlının Krasnoselsk kəndində anadan olub. O, futbolçu karyerasına Rusiyada başlayıb və "Saturn", "Spartak Moskva", "Tom", "Krylya Sovetov", "Mordoviya" kimi klublarda çıxış edib. 2016-cı ildə Portuqaliyanın "Boavişta" klubunda forma geyinən yarımmüdafiəçi, 2017-ci ildən etibarən isə Azərbaycan futbolunun ən köklü klublarından biri olan "Neftçi"nin şərəfini qoruyur.

Millidə ilk oyununu 4 sentyabr 2016-cı ildə San-Marino ilə qarşılaşmada keçirən Mahmudov, uzun müddət qol hesabını aça bilməsə də, 2021-ci ildən etibarən yığmanın əsas qol silahına çevrildi. Xüsusən də 2021-ci ildə 7 qol vuraraq qısa zamanda Azərbaycan millisinin bombardirləri siyahısında ilk "beşliyə" daxil olub.

Onun ən yaddaqalan qollarından biri 2023-cü ilin noyabrında İsveçə vurduğu möhtəşəm qoldur – Mahmudov həmin görüşdə dubla imza atmış və mərkəzdən zərbə ilə millimizi 3:0 hesablı qələbəyə daşıyan tarixi qolunu vurmuşdu.

11 iyun 2024-cü ildə Qazaxıstana vurduğu qolla Qurban Qurbanovun rekordunu təkrarlayan futbolçu, dünən – Ukrayna ilə matçda fərqlənməklə Azərbaycan futbol tarixinə millinin ən məhsuldar oyunçusu kimi adını yazdırdı.

Emin Mahmudovun Azərbaycan millisində vurduğu qollar:

6 sentyabr 2018 – Latviya ilə yoldaşlıq oyunu, Bakı - 1 qol (Azərbaycan – Latviya 1:3)

30 mart 2021 – DÇ-2022 seçmə oyunu, Bakı - 1 qol (Azərbaycan – Serbiya 1:2)

27 may 2021 – Türkiyə ilə yoldaşlıq oyunu, Alanya - 1 qol (Azərbaycan – Türkiyə 1:2)

1 sentyabr 2021 – DÇ-2022 seçmə oyunu, Lüksemburq - 1 qol (Azərbaycan – Lüksemburq 1:2)

4 sentyabr 2021 – DÇ-2022 seçmə oyunu, Dublin - 1 qol (Azərbaycan – İrlandiya 1:1)

12 oktyabr 2021 – DÇ-2022 seçmə oyunu, Belqrad - 1 qol (Azərbaycan – Serbiya 1:3)

14 noyabr 2021 – Qətərlə yoldaşlıq oyunu, Bakı - 2 qol (Azərbaycan – Qətər 2:2)

16 noyabr 2022 – Moldova ilə yoldaşlıq oyunu, Kişinyov - 1 qol (Azərbaycan – Moldova 1:2)

24 mart 2023 – Avro-2024 seçmə oyunu, Linz - 1 qol (Azərbaycan – Avstriya 1:4)

12 sentyabr 2023 – İordaniya ilə yoldaşlıq oyunu, Bakı - 1 qol (Azərbaycan – İordaniya 2:1)

16 noyabr 2023 – Avro-2024 seçmə oyunu, Bakı - 2 qol (Azərbaycan – İsveç 3:0)

11 iyun 2024 – Qazaxıstan ilə yoldaşlıq oyunu, Astana - 1 qol (Azərbaycan – Qazaxıstan 2:3)

9 sentyabr 2025 – DÇ-2026 seçmə oyunu, Bakı - 1 qol (Azərbaycan – Ukrayna 1:1).

Oxşar xəbərlər

Prezident İlham Əliyev Əfv Sərəncamı imzalayıb

İlham Əliyev Səməd Vurğun adına Yaradıcılıq Evinin açılışında iştirak edib

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Millinin yeni baş məşqçisi kim olacaq? - Ehtimal namizədlər

DÇ-2026 seçmə mərhələsi: Azərbaycan - Ukrayna oyununda qalib müəyyənləşmədi