"Sabah"ın tarixinə düşən futbolçu: "Komandadan ayrılmaq istəmirdim"

Bosniya və Herseqovinadan olan futbolçu Boyan Letiç "Sabah" klubundan ayrılmaq istəməyib.

33 yaşlı müdafiəçi bu barədə "Far.Az"a açıqlama verib.

O, Bakı təmsilçisi ilə yollarını ayırması ilə bağlı fikirlərini bölüşüb:

"Əslində bu sual kluba ünvanlanmalıdır. Çünki mən ümumiyyətlə komandadan ayrılmaq istəmirdim. Lakin zədələndim. Uzun müddət yaşıl meydanlardan kənarda qalacağımı biləndən sonra məni qeydiyyata salmayacaqlarını bildirdilər".

Komandanın avrokuboklardakı ilk qolunun müəllifi kimi tarixə düşən B.Letiç bəzi təkliflərin olduğunu da söyləyib:

"Amma hələlik bunlar məni qane etmir. Ümid edirəm ki, tezliklə məni razı salan təklif alacağam".

2022-ci ildən "Sabah"da çıxış edən müdafiəçi Azərbaycandakı karyerasından razı qaldığını sözlərinə əlavə edib:

"Orada olduğum müddətdə əldə etdiyimiz nəticələrə və komandaya kömək etdiyimə görə şadam. Bu, mənim üçün yaxşı dövr idi. Hər zaman xoş xatirələrlə xatırlayacağam".

Qeyd edək ki, "Sabah" yanvarın 5-də Boyan Letiçlə vidalaşdığını açıqlayıb.