Azərbaycan 2025-ci ilin dekabrından Ermənistana (Gürcüstan vasitəsilə) üç dəfə neft məhsulları tədarükü həyata keçirib, bu da iki ölkə arasında birbaşa ticarətin və iqtisadi qarşılıqlı fəaliyyətin başlanğıcının siqnalıdır.

"Far.Az" "Moody`s" beynəlxalq reytinq agentliyinə istinadən xəbər verir ki, Ermənistanın Azərbaycanla neft və neft məhsullarının alınması ilə bağlı danışıqları davam edir.

Hesabat müəlliflərinin fikrincə, danışıqlar uğurla başa çatdığı təqdirdə onilliklər boyu davam edən izolyasiya dövründən sonra struktur dəyişilə bilər və Ermənistanın Rusiya yanacağından asılılığı azala bilər.

"Geosiyasi gərginliyin azalması regional bağlantını və ticarəti gücləndirə bilər. Mart ayında sülh müqaviləsi şərtlərinin razılaşdırılmasından sonra Azərbaycan və Ermənistan arasında ikitərəfli münasibətlərdə konstruktiv irəliləyiş əldə olunub. İki ölkənin liderləri arasındakı diplomatik əlaqələr daha sıx olub. Həmçinin ABŞ-nin vasitəçiliyi ilə 2025-ci ilin avqustunda imzalanmış simvolik birgə bəyanat ərazi iddialarından imtinanı, sərhədin delimitasiyasını sürətləndirməyi və nəqliyyat marşrutlarını bərpa etməyi nəzərdə tutur", - agentlik qeyd edib.

"Moody`s"in qiymətləndirməsinə görə, iki ölkə arasında gərginliyin azalması hiss olunan iqtisadi nəticələr verməyə başlayıb. "Ötən ilin oktyabrında Azərbaycan öz ərazisi vasitəsilə Ermənistana yük tranzitinə qoyulan məhdudiyyətləri aradan qaldırıb ki, bu da iqtisadi əlaqələrin bərpası potensialını nümayiş etdirir", - hesabatda deyilib.

Cari ilin yanvarında ABŞ və Ermənistan "Tramp Marşrutu" (TRIPP, Trump Route for International Peace and Prosperity) layihəsinin həyata keçirilməsi çərçivəsini rəsmiləşdiriblər. Bu təşəbbüs regional ticarətin stimullaşdırılmasına, nəqliyyat əlaqələrinin genişləndirilməsinə, Mərkəzi Asiya və Xəzər regionunu Avropa ilə əlaqələndirən yeni marşrutların yaradılmasına yönəlib.

Qeyd edək ki, bu dəhliz Azərbaycanın Naxçıvan Muxtar Respublikası ilə birbaşa əlaqəsini təmin edir.

Oxşar xəbərlər

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Xankəndidə İqtisadi Əməkdaşlıq Təşkilatının 17-ci Zirvə görüşü keçirilib, İlham Əliyev çıxış edib

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2