Bakıda estetik əməliyyat etdirən 43 yaşlı qadın dünyasını dəyişib.

Hadisə Binəqədi rayonunda qeydə alınıb.

Belə ki, fevralın 10-da "Medi Hall" tibb müəssisəsində bədənşəkilləndirmə əməliyyatı edilən 1983-cü il təvəllüdlü Nigar İsmayılovanın qəfil halı pisləşib. Ona tibbi müdaxilə göstərilməsinə baxmayaraq, həyatını xilas etmək mümkün olmayıb.

Müəyyən edilib ki, "Medi Hall" hospitalının baş həkimi, adı daha əvvəl də bir sıra uğursuz estetik əməliyyatlarda hallanan Nigar Məhəmmədovadır. Sözügedən həkim əvvəllər "MedAura" klinikasında fəaliyyət göstərib və həmin dövrdə pasiyentlərin çoxsaylı şikayətləri ilə üzləşib.

Klinika direktoru isə Baku TV-yə qadının ölümünün tibb müəssisəsi ilə əlaqəsinin olmadığını bildirib. Onun sözlərinə görə, pasiyent əməliyyatdan bir neçə gün sonra evə buraxılıb və evində dünyasını dəyişib. Ölümün səbəbi kimi ürək problemi və tromboemboliya ehtimalı göstərilir.

Klinika rəhbərliyi qeyd edib ki, əməliyyatdan əvvəl pasiyent müayinədən keçirilib və hər hansı ciddi problem aşkarlanmayıb. Bildirilib ki, tromb yaranması halları müxtəlif səbəblərdən baş verə bilər və bu cür risklər istənilən şəxsdə mümkündür.

Hadisə ilə bağlı Səhiyyə Nazirliyi Analitik Ekspertiza Mərkəzindən bildirilib ki, "Medi Hall" tibb müəssisəsi ilə bağlı səlahiyyətlərinə aid olan bütün məsələlər ciddi şəkildə araşdırılır.

Qeyd olunub ki, Azərbaycan Respublikasının Cinayət Prosessual Məcəlləsinin 201.1-ci maddəsinə əsasən, istintaq sirrini təşkil edən məlumatların yayılması qadağandır və bu məlumatlar yalnız istintaqı aparan orqanın icazəsi ilə açıqlana bilər.

Baş vermiş ölüm hadisəsi ilə bağlı Baş Prokurorluğun mətbuat xidmətindən isə bildirilib ki, fevralın 10-da paytaxtın Binəqədi rayonu ərazisində yerləşən "Medi Hall" hospitalda əməliyyat olunmuş 1983-cü il təvəllüdlü Nigar İsmayılovanın üç gün sonra dünyasını dəyişməsi faktı ilə bağlı Binəqədi Rayon Prokurorluğunda araşdırma aparılır.

Bildirilib ki, hadisənin səbəbi tam, hərtərəfli və obyektiv araşdırıldıqdan sonra müvafiq qərar qəbul ediləcək.

Oxşar xəbərlər

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Həyatda yaxşı şeyləri niyə görmürük? - Tanınmış simaların FİKİRLƏRİ