Bakıda görkəmli Azərbaycan şairi Səməd Vurğunun 120 illiyinə həsr olunmuş ədəbi-musiqili gecə təşkil edilib.

"Report" xəbər verir ki, tədbir Səməd Vurğunun Ev-muzeyində "Gənc Şairlər" ədəbi layihəsi tərəfindən təşkil olunub.

Muzeyin direktoru Vurğun Vəkilov qonaqları Novruz bayramı münasibətilə təbrik edib və şairin yubileyinin genişmiqyaslı şəkildə qeyd olunmasını diqqətə çatdırıb.

Daha sonra söz "Gənc Şairlər" layihəsinin rəhbəri Lalə Həsənovaya verilib. O vurğulayıb ki, iştirakçılar dörd dildə - Azərbaycan, rus, ingilis və fransız dillərində proqram hazırlayıb, Səməd Vurğunun əsərlərini müxtəlif interpretasiyalarda təqdim ediblər: "Biz şairin yaradıcılığını çoxdilli formatda göstərməyə və onun universallığını ifadə etməyə çalışdıq".

L.Həsənova muzey rəhbərliyinə layihəyə dəstəyə görə təşəkkürünü ifadə edib.

Gecə çərçivəsində layihənin gənc iştirakçıları çıxış edərək ədəbi və bədii nömrələr təqdim ediblər.

Proqramın musiqi hissəsini Tofiq Quliyevin "Gölün sahilində" əsəri ilə İradə Hasilovanın və Arif Məlikovun "Prelüdiya"sını ifa edən İmran Şıxiyevin çıxışları bəzəyib.

Gecənin sonunda iştirakçılar təşəkkür sertifikatları ilə, layihənin rəhbəri Lalə Həsənova isə təşəkkürnamə təltif olunub.

Oxşar xəbərlər

Şəhid analarının iştirakı ilə Vətən müharibəsində Zəfərin 5 illiyinə həsr olunmuş tədbir keçirilib

Vətən müharibəsində Qələbənin beşinci ildönümünə həsr olunmuş Hərbi parad keçirilib

Bakıda Azərbaycan səhiyyəsi üçün önəmli tədbir keçirilib

İlham Əliyev Səməd Vurğun adına Yaradıcılıq Evinin açılışında iştirak edib

20 Sentyabr - Neftçilər Günü münasibətilə tədbir keçirilib