Bakıda Medianın İnkişafı Agentliyinin (MEDİA) təşkilatçılığı ilə "Prezident İlham Əliyevin sülh strategiyası sabitliyin qarantıdır" mövzusunda dəyirmi masa keçirilib.

"Report" xəbər verir ki, tədbirdə çıxış edən Agentliyin İcraçı direktorunun müavini Natiq Məmmədli Azərbaycan mediasının dünyada sülhün təbliğatçısı olmasının vacibliyini vurğulayıb.

Onun sözlərinə görə, bu vəzifə media etikasının bütün prinsipləri ilə səsləşir:

"Yalan xəbər doğru xəbərdən altı dəfə sürətlə yayılır. Hətta yalan xəbəri təkzib etdikdə belə, bu, feyk informasiyanın yayılması qədər effekt vermir. Bizim mediamızın əsas hədəfi sülhü təbliğ etməkr, həqiqəti deməkdir. Sülh haqqında düşüncələrimizi bacardıqca peşəkar səviyyədə yaymalıyıq".

Keçmiş xarici işlər naziri Tofiq Zülfüqarov çıxışında qeyd edib ki, Azərbaycana və müttəfiqlərinə qarşı müxtəlif mərkəzlərin hələ də müəyyən məkrli planları var. Bu səbəbdən, media bütün bu proseslər fonunda ayıq-sayıq olmalıdır.

Keçmiş nazir əlavə edib ki, Vətən müharibəsindən sonra da bəzi böyük oyunçular Azərbaycana qarşı müxtəlif planlar həyata keçirməyə çalışıblar:

"Çalışırdılar ki, bir ocaq yaradaraq Azərbaycana qarşı fəaliyyətlərini davam etdirsinlər. Azərbaycanın qələbəsi böyük bir zəfərdir. Biz bu məsələdə çox həssas və diqqətli olmalıyıq. Azərbaycana və müttəfiqlərinə qarşı müxtəlif mərkəzlərin hələ də müəyyən məkrli planları var".

Milli Məclisin deputatı Fariz İsmayılzadə isə öz növbəsində Azərbaycanın Cənubi Qafqazda etibarlı tərəfdaş olmasına toxunub.

O həmçinin Ermənistanda keçiriləcək parlament seçkilərinə toxunaraq qeyd edib ki, bu ölkənin daxilində baş tutan fikir müxtəlifliyi səbəbindən bəzi qüvvələr sülh prosesinə zərbə vurmaq istəyir.

Deputat Rizvan Nəbiyev deyib ki, Azərbaycana son zamanlar edilən yüksəksəviyyəli səfərlər ölkənin dünyada baş verən proseslər fonunda etibarlı tərəfdaş olduğundan xəbər verir.

Tarixçi-alim Rizvan Hüseynov regiondakı proseslərdən bəhs edərək bildirib ki, hazırda Fransa öz nəzərlərini Cənubi Qafqaza çevirib:

"Azərbaycan regionun lider dövlətidir. Qarabağı azad etmək necə bizim üçün prioritet idisə, Azərbaycanın Cənubi Qafqazda liderliyini qoruması da elədir. Fransanın Ermənistanı alət kimi istifadə etməsi heç bir işə yaramayacaq".

Tədbir media nümayəndələrinin sual-cavab sessiyası ilə yekunlaşıb.

Oxşar xəbərlər

Vətən müharibəsində Qələbənin beşinci ildönümünə həsr olunmuş Hərbi parad keçirilib

Leyla Əliyeva "Mənzərəyə açılan ev" mövzusunda qrup sərgisində iştirak edib

SOCAR-ın təşkilatçılığı, "Neftçi" və "Galatasaray" klublarının tərəfdaşlığı ilə şəhid və qazi övladları üçün "Futbol günü" adlı tədbir keçirilib

İlham Əliyevin İranın Azərbaycana dron hücumuna dair mövqeyi dünya mediasının diqqət mərkəzindədir

ABŞ vitse-prezidentinin Azərbaycana səfəri dünya mediasının diqqətindədir