Azərbaycanın Belçika, Lüksemburq və Avropa İttifaqındakı səfirliyində ölkənin Müstəqillik Günü münasibətilə bayram tədbiri keçirilib.

"Report"un Avropa bürosunun məlumatına görə, tədbirin əvvəlində Azərbaycan, Belçika və Avropa İttifaqının dövlət himnləri səsləndirilib.

Azərbaycan Respublikasının Belçika Krallığı və Lüksemburq Böyük Hersoqluğundakı səfiri, Avropa İttifaqı yanında missiyanın rəhbəri Vaqif Sadıxov çıxış edərək, yaradılmasının 108-ci ildönümünü qeyd etdiyimiz Azərbaycan Xalq Cümhuriyyətinin milli tariximizdə tutduğu mühüm yerdən danışıb. Rəsmi Bakının daxili və beynəlxalq siyasətdəki uğurlarından danışan səfr Azərbaycanla Avropa İttifaqı təsisatları arasında siyasi dialoqun intensivləşməsini vurğulayıb.

O, mart ayında Avropa İttifaqı Şurasının sədri Antonio Koştanın Bakıya və may ayında Aİ-nin xarici işlər və təhlükəsizlik siyasəti üzrə ali nümayəndəsi Kaya Kallasın səfərlərini xatırladaraq, bu təmasların Azərbaycan ilə Avropa İttifaqı arasında münasibətlərin yeni dinamikasını əks etdirdiyini qeyd edib. Səfir vurğulayıb ki, Aİ Mərkəzi Asiya ilə əlaqələrini gücləndirdikcə, Azərbaycan strateji coğrafi mövqeyi və müasir infrastrukturu sayəsində etibarlı nəqliyyat və logistika mərkəzi kimi çıxış etməyə hazırdır.

Öz növbəsində, Azərbaycanın NATO-dakı missiyasının rəhbəri Cəfər Hüseynzadə bildirib ki, müstəqillik təkcə bəyannamə deyil, həm də daimi müdafiə, güclü dövlət qurumları və müdafiə potensialı tələb edir.

O, qeyd edbi ki, ümummilli lider Heydər Əliyev 1993-cü ildə hakimiyyətə qayıtdıqdan sonra Azərbaycanda genişmiqyaslı siyasi və hərbi islahatlara başlanılıb və bu islahatlar Prezident İlham Əliyevin rəhbərliyi altında yeni mərhələyə qədəm qoyub, ölkənin beynəlxalq səviyyədə tanınmış sərhədləri daxilində ərazi bütövlüyünün və suverenliyinin bərpasını təmin edib.

Onun sözlərinə görə, münaqişənin sona çatması və regionda sülhün bərqərar olması Azərbaycanın beynəlxalq arenada daha fəal rol oynamasına və nüfuzlu geosiyasi aktyor kimi mövqeyini möhkəmləndirməsinə imkan verib. Tədbir mədəni proqramla davam edib.

Oxşar xəbərlər

Bakı sakinləri Zəfərin beşinci ildönümünü qeyd edir

Bakıda WUF13-ün Sessiyasının açılış mərasimi keçirilib, Prezident İlham Əliyev çıxış edib

20 Sentyabr - Neftçilər Günü münasibətilə tədbir keçirilib

Vətən müharibəsində Qələbənin beşinci ildönümünə həsr olunmuş Hərbi parad keçirilib

Leyla Əliyeva, Arzu Əliyeva və Alyona Əliyeva "Təmiz Dünya" sığınacağındakı uşaqların bayram sevincinə şərik olublar