Avropa Komissiyasının ölkənin yeni hökuməti ilə antikorrupsiya və hüquqi islahatlar paketini razılaşdırmasından sonra Avropa İttifaqı (Aİ) Macarıstan üçün 10 milyard avro blokdan çıxaracaq.

"Far.Az"un Avropa bürosunun məlumatına görə, bu barədə Avropa Komissiyasının sədri Ursula fon der Lyayen Macarıstanın yeni Baş naziri Peter Madyarla görüşdən sonra Brüsseldə brifinqdə açıqlayıb.

"Bu gün Macarıstan üçün 10 milyard avronun blokdan çıxarıla biləcəyini elan etməkdən çox məmnunam", - fon der Lyayen Avropa Komissiyasının qərargahında danışıqlardan sonra deyib.

Onun sözlərinə görə, vəsaitlərin ayrılması Budapeştin razılaşdırılmış islahatları yerinə yetirməsindən və "Next Generation EU" proqramı çərçivəsində investisiya layihələrinin həyata keçirilməsindən asılı olacaq.

Bundan əlavə, tərəflər Brüsselin qiymətləndirməsinə görə iqtisadiyyat və universitetlər üzərində siyasi nəzarət riskləri yaradan "ictimai maraq fondları" adlanan sistemin tədricən ləğvi barədə razılığa gəliblər.

Ursula fon der Lyayen həmçinin bildirib ki, Budapeştin Avropa İttifaqının əsas şərtlərini yerinə yetirməsindən sonra Aİ-nin Həmrəylik Fondundan (Cohesion Fund) əlavə 4,2 milyard avro vəsaitin blokdan çıxarılması qərara alınıb.

Bundan başqa, Macarıstan akademik azadlığın qorunması üzrə tədbirləri, o cümlədən universitetlərin idarəedilməsi islahatını qəbul etdikdən sonra daha 2,2 milyard avro əldə edə biləcək.

Avropa Komissiyasının rəhbəri qeyd edib ki, artıq növbəti tədris ilindən macarıstanlı tələbələr yenidən "Erasmus+" proqramında iştirak edə biləcəklər: "Bazarlar artıq dəyişiklikləri hiss edir. İnvestorların inamı geri qayıdır. Etimad bərpa olunur".

Oxşar xəbərlər

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Azərbaycanlı aparıcıların bitirdiyi universitetlər və ixtisasları - SİYAHI

İlham Əliyev və Peter Pelleqrini Bratislavada Devin qəsrində olublar