Azərbaycanda halal aqrar sektorun inkişafı üzrə 5 strateji istiqamət müəyyənləşdirilib.

"Report" xəbər verir ki, bunu kənd təsərrüfatı naziri Məcnun Məmmədov Bakıda keçirilən İslam İnkişaf Bankı (IsDB) Qrupunun 51-ci İllik Toplantısı çərçivəsində təşkil olunmuş "Davamlı Regional İnteqrasiya üçün Halal İqtisadiyyat" tədbirində bildirib.

O, tərəfdaşlara və investorlara bir neçə konkret təklif verib: "Birincisi, vahid halal sertifikatlaşdırma və rəqəmsal izləniləbilənlik sisteminin yaradılmasıdır. İnvestorların beynəlxalq səviyyədə tanınan və etibarlı standartlara ehtiyacı var. Azərbaycan bu istiqamətdə liderlik etməyə hazırdır və sizi də bu sistemin formalaşdırılmasında tərəfdaş olmağa dəvət edirik.

İkincisi, inteqrasiya olunmuş yaşıl halal aqroparkların yaradılmasıdır. Məqsədimiz bərpa olunan enerji ilə təmin edilən, istehsal, emal, sertifikatlaşdırma və soyuq zəncir logistikasını bir araya gətirən ixracyönümlü investisiya zonaları formalaşdırmaqdır.

Üçüncüsü, halal sektoru üçün xüsusi maliyyə alətlərinin inkişaf etdirilməsidir. İslam maliyyəsi, inkişaf banklarının kapitalı və birbaşa investisiyaları birləşdirən qarışıq maliyyələşdirmə mexanizmləri vasitəsilə bazara giriş xərclərinin azaldılması və investorlar üçün daha əlverişli imkanların yaradılması nəzərdə tutulur.

Dördüncüsü, halal ixracının Orta Dəhlizlə inteqrasiyasının gücləndirilməsidir. İstehsalçılarımızı Körfəz və Avropa bazarları ilə birləşdirən logistika həllərinə üstünlük verərək, çatdırılma sürətini Azərbaycanın rəqabət üstünlüyünə çevirməliyik.

Beşincisi və ən vacibi, insan kapitalına və innovasiyalara investisiyadır. Qida elmi, keyfiyyətə nəzarət və sertifikatlaşdırma sahələrində peşəkar kadrların hazırlanması sayəsində məhsullarımızın keyfiyyəti təkcə vəd deyil, həm də etibarlı zəmanət olacaq".

"Qapılarımız açıqdır. Gəlin birlikdə Azərbaycanı etik prinsiplərə əsaslanan, yüksək keyfiyyətli və yüksək gəlirli halal istehsalın aparıcı regional mərkəzinə çevirək", - deyə nazir əlavə edib.

Oxşar xəbərlər

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib