Tacikistan alüminium istehsalının ehtiyacları üçün Azərbaycan tərəfindən gil-torpaq almağa hazırdır.

Bu barədə "Report"a açıqlamasında Tacikistanın Azərbaycandakı səfiri İlhom Abdurahmon bildirib.

Diplomat qeyd edib ki, hər iki ölkənin müvafiq müəssisələri - Tacikistan Alüminium Şirkəti (TALKO) və "Azəralüminium" – artıq əməkdaşlığa dair müqavilə imzalayıb.

Səfir bildirib ki, təxminən bir ay əvvəl Azərbaycanın paytaxtı Bakıda Ticari-iqtisadi əməkdaşlıq üzrə Hökumətlərarası Komissiyanın Baş nazir müavinləri səviyyəsində növbəti iclası keçirilib və bu çərçivədə digər məsələlərlə yanaşı, alüminium ilə bağlı mövzuya da toxunulub.

"Həmin iclas zamanı müəyyən razılaşmalar əldə olunub. Bu məsələ müzakirə edildi. Hər iki tərəf qarşılıqlı maraq nümayiş etdirdi, xüsusən də ona görə ki, hazırda alüminiumun qiyməti bir qədər artıb. Logistika imkanlarını nəzərə alaraq, yaxın vaxtlarda Azərbaycana alüminiumun tədarükü məsələsi işlənib hazırlana bilər. Bildiyim qədərilə, Azərbaycan tərəfinin alüminium zavodu var və bu metalı müstəqil şəkildə istehsal edir. Bununla belə, Azərbaycanda alüminium idxalına da ehtiyac var. Tacikistan onu həmişə qarşılıqlı məqbul qiymətlərlə ixrac etməyə hazırdır", - İ.Abdurahmon bildirib.

Diplomat vurğulayıb ki, yekun qərarlar iki şirkətin ixtiyarında qalır, çünki söhbət nəqliyyat və logistika xərclərini nəzərə alaraq tədarükün rentabelliyini müstəqil şəkildə qiymətləndirəcək kommersiya strukturlarından gedir:

"İstehsalat sahəsində strateji qarşılıqlı fəaliyyətə gəldikdə, Gəncə Gil-torpaq zavodunun işinin bərpa edilməsi variantı da işlənib hazırlanır. Əgər gələn il onun işə salınması və ya modernləşdirilməsinə başlansa, Tacikistan azərbaycanlı tərəfdaşlarından gil-torpaq almağa hazır olacaq. Logistika baxımından bu bizim üçün çox sərfəlidir. Hesab edirəm ki, bu, Tacikistana gil-torpaq idxalı və paralel olaraq Azərbaycana alüminium ixracı üçün mükəmməl bir addım olacaq".

Oxşar xəbərlər

Azərbaycan Prezidenti İlham Əliyev yerli televiziya kanallarına müsahibə verib - YENİLƏNİB-2

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN, YENİLƏNİB-2

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

Bakıda TDT Xəritəçəkmə Qurumları Rəhbərlərinin ikinci iclası keçirilib, bəyannamə qəbul edilib