Bu ilin yanvar-iyun aylarında turizm məqsədilə Azərbaycana səfər etmiş 723 min 222 turistdən 21 min 898 nəfəri birgünlük ziyarətçi olub.

"Far.Az" rəsmi statistikaya istinadən xəbər verir ki, bu, ötən ilin eyni dövrünə nisbətən 29,5 % çoxdur.

Birgünlük ziyarətçilərin 18 min 737 nəfəri və yaxud 85,5 %-i Azərbaycana tranzit məqsədilə səfər edib.

Hesabat dövründə 1 072 nəfər işgüzar (+ 74,3 %), 866 nəfər (+29 %) qohum və dostlarını ziyarət etmək, 1 056 nəfər (+ 16,2 %) istirahət və əyləncə məqsədilə Azərbaycana səfər edib. Bundan başqa, 90 nəfər (+ 34,3 %) alış-veriş, 77 nəfər ( 2,1 dəfə çox) isə dini ziyarət məqsədilə ölkəyə gəlib.

Ölkələr üzrə ən çox birgünlük ziyarətçi qeyri-qonşu ölkələrin payına düşüb – 9 508 nəfər (+16,9 %). Sonrakı yerlərdə 7 026 nəfərlə Rusiya (+ 34,3 %), 4 228 nəfərlə Türkiyə (+ 60,2 %), 954 nəfərlə Gürcüstan (+ 33,4 %) və 182 nəfərlə İran (- 30 %) qərarlaşıb.

Rusiya vətəndaşlarından 5 816 nəfər (+ 35 %), Türkiyə vətəndaşlarından isə 3 050 nəfər (+56,6 %) Azərbaycandan tranzit keçid üçün istifadə edib.

Birgünlük ziyarətçilər yanvar-iyun aylarında ölkədə ümumilikdə 9 milyon 193,4 min manat xərcləyiblər. Bu, illik müqayisədə 25,2 % çoxdur. Xərclərin 7 milyon 364,3 min manatı və yaxud 80,1 %-i nəqliyyat xidmətlərinin payına düşüb. Bu da 1 il əvvələ nisbətən 24,5 % çoxdur.

Hesabat dövründə turistlər malların və hədiyyələrin alınmasına 1 milyon 86,5 min manat (+30,9 %), qidalanmaya 710,6 min manat (+ 24,1 %), mədəniyyət xidmətlərinə 4,8 min manat (+29,7 %), idman və əyləncə xidmətlərinə 2,7 min manat (+50 %), digər məqsədlərə isə 24,5 min manat (+ 33,1 %) xərcləyiblər.

Ölkələr üzrə ən böyük xərc qeyri-qonşu ölkələrdən gələn ziyarətçilərə məxsus olub – 5 milyon 029,6 min manat (+15 %). Rusiya vətəndaşları 2 milyon 671,9 min manat (+36,9 %), Türkiyə vətəndaşları 1 milyon 080 min manat (+62,6 %), Gürcüstan vətəndaşları 337,6 min manat (+36 %), İran vətəndaşları isə 73,8 min manat (- 30 %) xərcləyiblər.

Beləliklə, birgünlük ziyarətçilərin böyük hissəsi Azərbaycandan tranzit məqsədilə istifadə edir və onların xərclərinin əsas hissəsi nəqliyyata yönəlir.

Bu ilin I yarısında Azərbaycana 189 ölkədən 1 milyon 92,6 min nəfər və yaxud ötən ilin eyni dövrü ilə müqayisədə 10,3 % az əcnəbi və vətəndaşlığı olmayan şəxs gəlib. Gələnlərin 28,1 %-i Rusiya, 21 %-i Türkiyə, 8,2 %-i İran, 4,9 %-i Gürcüstan, 4,6 %-i Qazaxıstan, 3,2 %-i Özbəkistan, 2,9 %-i Pakistan, 2,8 %-i Hindistan, 2,6 %-i İsrail, 2,4 %-i Çin, 1,8 %-i Səudiyyə Ərəbistanı, 1,6 %-i Ukrayna, 1,3 %-i Türkmənistan, hər birindən 1,1 % olmaqla Almaniya və Böyük Britaniya, 12,4 %-i digər ölkələrin vətəndaşları və vətəndaşlığı olmayan şəxslər olub, 68,7 %-ni kişilər, 31,3 %-ni qadınlar təşkil edib.

Son 1 ildə Avropa İttifaqına üzv ölkələrdən gələnlərin sayı 9,3 % artaraq 54,4 min nəfər, MDB ölkələrindən gələnlərin sayı 1,8 % artaraq 430,4 min nəfər, körfəz ölkələrindən gələnlərin sayı 31,4 % azalaraq 127,7 min nəfər, digər ölkələrdən gələnlərin sayı 14,1 % azalaraq 480,1 min nəfər təşkil edib.

Ölkəmizə gəlmiş əcnəbilər və vətəndaşlığı olmayan şəxslərin 71,1 %-i hava, 27,5 %-i dəmir yolu və avtomobil, 1,4 %-i isə dəniz nəqliyyatından istifadə edib.

Oxşar xəbərlər

Palçıq Vulkanları Turizm Kompleksi – Azərbaycanın təbiət möcüzələrinə açılan yeni qapı

Bytelecom-da alış-veriş Bodruma səyahət imkanı qazandırır

Din xadimləri Qarabağ və Şərqi Zəngəzurdakı tarixi-dini abidələri ziyarət ediblər

Qış turizm mövsümü öncəsi daxili turizm imkanları nümayiş etdirilib

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN