"Moon Kids" uşaq bağçasının dələduzluqda ittiham olunan direktoru Havvaxanım Rüstəmovaya 3 il sınaq müddəti olmaqla şərti cəza verilib.

"Report"un məlumatına görə, bu barədə hökm Bakı Ağır Cinayətlər Məhkəməsində keçirilən prosesdə elan olunub.

Hökmə əsasən, Havvaxanım Rüstəmovaya 3 il dövlət qulluğunda vəzifə tutmaqdan məhrum edilməklə 5 il 6 ay müddətinə azadlıqdan məhrumetmə cəzası verilib. Onun cəzası 3 il sınaq müddəti olmaqla şərti hesab olunub.

Eləcə də onun barəsində seçilən ev dustaqlığı qətimkan tədbiri başqa yerə getməmək qətimkan tədbiri ilə əvəz olunub.

Həmçinin iclasda dövlət ittihamçısı çıxış edərək onun 7 il müddətinə azadlıqdan məhrum edilməsini istəyib.

Xatırladaq ki, Havvaxanım Rüstəmova 2024-cü ilin iyulunda saxlanılıb.

Baş Prokurorluğun məlumatına görə, "Moon Kids" Məhdud Məsuliyyətli Cəmiyyətdə yol verilən qanunsuzluqlarla bağlı Nizami Rayon Prokurorluğunda cinayət işi açılıb.

Cinayət işi üzrə MMC-nin direktoru Havvaxanım İmamət qızı Rüstəmova Cinayət Məcəlləsinin 178.2.2, 178.2.3, 178.2.4 (qulluq mövqeyindən istifadə etməklə təkrarən və xeyli miqdarda dələduzluq) və 308.1-ci (vəzifə səlahiyyətlərindən sui-istifadə) maddələrilə təqsirləndirilən şəxs qismində cəlb edilərək barəsində həbs qətimkan tədbiri seçilib.

Sonradan onunla bağlı olan həbs qətimkan tədbiri ev dustaqlığı ilə əvəz olunub.

"Moon Kids" uşaq bağçasının fəaliyyəti dayandırılıb.

Qeyd edək ki, Havvaxanım Rüstəmova 2023-cü ildə "İlin ən uğurlu iş xanımı" nominasiyasına layiq görülüb.

MƏLUMAT YENİLƏNİR ...

Oxşar xəbərlər

Prezident İlham Əliyev Əfv Sərəncamı imzalayıb

Heydər Əliyev Mərkəzində "Vəhşi təbiətin super qəhrəmanları" sərgisi açılıb

DSMF uşaq bağçasının direktoruna qarşı mülki iddia qaldırıb - MƏHKƏMƏ

Ermənistan vətəndaşlarının məhkəməsində hökm elan olunub - YENİLƏNİB

Arayik Arutyunyan və digərlərinə hökm oxundu