OpenAI şirkəti İranla əlaqəli şəxslərin süni intellektdən və saxta jurnalist kimliklərindən istifadə edərək ABŞ-nin İrana qarşı müharibəsini tənqid edən məqalələri müxtəlif media orqanlarında dərc etdirdiyini açıqlayıb.

Far.Az xəbər verir ki, şirkətin bloq paylaşımına əsasən, dünya üzrə təxminən 12 media qurumu saxta jurnalistlər tərəfindən hazırlanmış 100-ə yaxın məqalə yayımlayıb.

OpenAI bildirib ki, əməliyyatda iştirak etdiyi ehtimal olunan şəxslərin fars dilində ChatGPT-dən istifadə edərək məqalələr hazırladığı, redaksiya təqdimatlarını təkmilləşdirdiyi və sosial şəbəkələr üçün şərhlər yaratdığı müəyyən edilib. Şirkət həmin hesabları bloklayıb.

Məqalələr arasında ABŞ-nin İran siyasətini və Qərbin mənəvi nüfuzunu tənqid edən yazılar da olub. Onları yayımlayan media qurumlarının heç birinin böyük, əsas xəbər təşkilatı olmadığı, lakin bəzilərinin internetdə geniş auditoriyaya malik olduğu bildirilib.

OpenAI əməliyyatın arxasında konkret kimin dayandığını və iştirakçıların İran hökuməti ilə əlaqəsinin olub-olmadığını müəyyənləşdirə bilmədiyini vurğulayıb. Şirkətin qiymətləndirməsinə görə, fəaliyyət kommersiya məqsədli təsir kampaniyasına bənzəyib.

Məlumata görə, məqalələr dərc edildikdən sonra ChatGPT-dən sosial şəbəkələrdə həmin yazılara reaksiya verən şəxslər kimi görünmək üçün şərhlər hazırlamaq məqsədilə də istifadə olunub. Bu mətnlərdə ABŞ təcavüzkar, İsrail etibarsız müttəfiq, İran isə müqavimət göstərən tərəf kimi təqdim edilib.

Xarici təsir əməliyyatlarını araşdıran ekspert Cessika Brandt bildirib ki, süni intellekt belə kampaniyaların təşkilatçılarına fəaliyyətlərini gizlətmək və məzmunu real media kanalları vasitəsilə yaymaq imkanı verir.

Qeyd edək ki, OpenAI-ın açıqlaması süni intellektin beynəlxalq münaqişələr zamanı ictimai rəyə təsir göstərmək məqsədilə istifadəsi ilə bağlı müzakirələri yenidən gündəmə gətirib. Şirkət konkret iştirakçıların kimliyini müəyyənləşdirə bilmədiyindən, əməliyyatın İran hökuməti tərəfindən idarə olunduğu təsdiqlənməyib.

Oxşar xəbərlər

Lənkəranın turizm imkanları geniş auditoriyaya nümayiş etdirilib

Prezident İlham Əliyev IV Şuşa Qlobal Media Forumunun açılışında iştirak edib - YENİLƏNİB-3

Bakıda İlham Əliyevin iştirakı ilə "Yeni dünya nizamına doğru" mövzusunda beynəlxalq forum keçirilib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

Azərbaycan Prezidenti İlham Əliyev yerli televiziya kanallarına müsahibə verib - TAM MƏTN