"Azərbaycanda kərə və duru yağların qiymətində müşahidə olunan artım bir sıra amillərlə bağlıdır. Bahalaşmaya xammalın maya dəyərinin yüksəlməsi, logistika xərcləri, idxaldan asılılıq və yerli istehsalın tələbatı tam qarşılamaması təsir göstərir".

Far.Az-in məlumatına görə, bunu Azərbaycan Qiymətləndiricilər Cəmiyyətinin (AQC) sədri Vüqar Oruc açıqlayıb.

Onun sözlərinə görə, yağ məhsullarının qiymət artımını şərtləndirən əsas səbəblərdən biri beynəlxalq bazarlarda xammal və hazır məhsulların bahalaşmasıdır:

"İstehsal xərclərinin, daşınma və logistika məsrəflərinin artması da son qiymətlərə təsirsiz ötüşmür. Azərbaycan bazarında İran, Avropa ölkələri, Rusiya və digər dövlətlərdən gətirilən yağ məhsulları mühüm paya malikdir. Bu səbəbdən xarici bazarlarda qiymətlərin yüksəlməsi ölkə daxilində də bahalaşmaya səbəb olur. Eyni zamanda, yerli yağ istehsalının ötən ilin müvafiq dövrü ilə müqayisədə təxminən 10 faiz azalması bazardakı vəziyyətə əlavə təsir göstərib.

Oktyabr ayında yağ məhsullarının qiymətində təxminən 15 faizlik artım qeydə alınıb. Bəzi xarici markaların, o cümlədən "Anchor" və "New Zealand" məhsullarının qiymətində 3–3,50 manat civarında bahalaşma müşahidə olunub.

Qiymətlərə təsir edən digər amil isə əhalinin tələbatının yüksək olmasıdır. Yerli istehsalın bazarın bütün ehtiyaclarını ödəyə bilməməsi və idxal məhsullarının bahalaşması istehlakçıların seçimlərinə, eləcə də satış qiymətlərinə təsir edir".

AQC sədri əlavə edib ki, gələcəkdə yerli istehsalın genişləndirilməsi qiymət təzyiqinin azaldılmasına kömək edə bilər:

"İşğaldan azad edilmiş ərazilərdə yeni istehsal müəssisələrinin yaradılması ilə bağlı planların reallaşması bazarın yerli məhsullarla təminatına töhfə verə bilər. Bununla yanaşı, kənd təsərrüfatında, xüsusilə heyvandarlıq və süd istehsalı sahələrində mövcud potensialın daha səmərəli istifadəsi də vacib amillərdən sayılır".

Orxan Hüseyn

Oxşar xəbərlər

Azərbaycanın yeni sənaye modelinin konturları - TƏHLİL

Azərbaycanlı məşhurlar Ramazanda oruc tutacaqlar?

Prezident İlham Əliyev Qaradağ rayonunda kağız və gigiyenik məhsulların istehsalı müəssisəsinin açılışında iştirak edib

Prezident İlham Əliyevin sədrliyi ilə kənd təsərrüfatı məsələlərinə həsr olunmuş müşavirə keçirilib

Azərbaycanda əmlak bazarının strukturu dəyişir: İndi nə almaq daha sərfəlidir?