Qadınların məlumat və dəstək resurslarına çıxışını asanlaşdıran sosial təşəbbüs TAF!26 və Ad Black Sea festivallarında mükafatlandırılıb

Azercell-in "Oflayn Qadınlar" sosial layihəsi beynəlxalq uğurlarını davam etdirir. Zorakılıqla üzləşən və ya zorakılıq riski altında olan qadınların məlumat və yardım resurslarına çıxışını asanlaşdıran təşəbbüs Daşkənd Reklam Festivalı - TAF!26-da bir qızıl və iki gümüş, Batumidə keçirilən Ad Black Sea beynəlxalq yaradıcılıq festivalında isə bir gümüş və bir bürünc mükafata layiq görülüb.

TAF!26-da "Oflayn Qadınlar" layihəsi "Sosial və KSM kampaniyaları" kateqoriyasının "Ən yaxşı sosial təsir kampaniyası" nominasiyası üzrə qızıl mükafat qazanıb. Layihə, həmçinin "Yaradıcılıq və icra ustalığı" kateqoriyasında "Ən yaxşı kreativ strategiya" və "Media kampaniyaları" kateqoriyasında "Ən yaxşı inteqrasiya olunmuş media kampaniyası" nominasiyaları üzrə iki gümüş mükafatla təltif olunub.

Regionun biznes, marketinq və yaradıcılıq sənayesi nümayəndələrini bir araya gətirən TAF!26 festivalında 2 000-dən çox iştirakçı və 70-dən çox yerli və beynəlxalq ekspert iştirak edib. Müsabiqəyə 35 nominasiya üzrə 483 kreativ layihə təqdim olunub.

Ad Black Sea festivalında isə təşəbbüs sosial təsiri və yaradıcı icrasına görə fərqlənib. "Oflayn Qadınlar" "Dayanıqlı İnkişaf Məqsədləri / İnsanlar" kateqoriyasında gümüş, "Kino sənəti / Rejissor işi" kateqoriyasında isə bürünc mükafat qazanıb. Reklam və yaradıcılıq sənayesini bir araya gətirən festivalın builki müsabiqəsində müxtəlif ölkələrdən təqdim edilmiş 400-dən çox iş qiymətləndirilib.

"Oflayn Qadınlar" zorakılıq halları və riskləri barədə hüquqi və praktiki məlumatları, eləcə də mövcud yardım mexanizmlərini qadınlar üçün daha əlçatan edən rəqəmsal platformadır. Layihənin əsas üstünlüklərindən biri platformaya internet paketi və balans olmadan da daxil olmaq imkanıdır. Azercell abunəçiləri aktiv internet paketləri və ya balanslarında vəsait olmadığı halda belə oflaynqadinlar.az saytından istifadə edərək məlumat və dəstək resurslarına çıxış əldə edə bilirlər.

Oxşar xəbərlər

SWG SPA təşkilatı Azərbaycan Milli Məclisinə keçirilən seçkilərin "exit-poll" nəticələrini açıqlayıb

"Oracle Advisory Group" parlament seçkilərində "exit poll"un nəticələrini açıqlayıb

Sosioloji Tədqiqatlar Mərkəzi növbədənkənar parlament seçkilərində “exit-poll”un nəticələrini açıqlayıb

Azərbaycanda mobil telefon nömrələri 1 000 - 75 000 manata hərraca çıxarılır

Azərbaycan Mərkəzi Bankının valyuta məzənnələri (17.01.2025)