2027-ci ildə Azərbaycanda 52 dövlət müəssisəsi dövlət büdcəsinə ümumilikdə 872 milyon manat dividend ödəməli olacaq.

"Report" xəbər verir ki, bu, 2027-ci ilin büdcə zərfinin layihəsində öz əksini tapıb.

Sənəd Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında müzakirə edilir.

Büdcə zərfinə əsasən, 2026-cı illə müqayisədə dividend öhdəliyi olan müəssisələrin ümumi sayı 26 dəfə, dividend ödənişinin ümumi məbləği isə 45,3 % artırılıb.

Gələn il dividendin 434 milyon manatını Azərbaycan Dövlət Neft Şirkəti (SOCAR), 175 milyon manatını isə "Azərbaycan Beynəlxalq Bankı" ASC ödəməlidir.

Bundan başqa, Müdafiə Sənayesi Nazirliyinə məxsus "Azərsilah" QSC Müdafiə Sənayesi Holdinqi 71,3 milyon manat, "Azərbaycan Hava Yolları" QSC 48,8 milyon manat, "AzerGold" QSC 39,6 milyon manat, "Azərenerji" ASC 36,5 milyon manat, Rəqəmsal İnkişaf və Nəqliyyat Nazirliyinə məxsus "AzInTelecom" MMC-nin səhmdarı olduğu "Azercell Telecom" MMC 21,3 milyon manat, İqtisadiyyat Nazirliyinə məxsus "Azərbaycan Biznesinin İnkişafı Fondu" ASC 7,9 milyon manat, "Azəralüminium" MMC 4 milyon manat, Dövlət Reklam Agentliyi 3,1 milyon manat, "Azərişıq" ASC 2,4 milyon manat, İqtisadiyyat Nazirliyi yanında Əmlak Məsələləri Dövlət Xidmətinə məxsus Daşınmaz Əmlakın Dövlət Kadastrı və Reyestri 2,3 milyon manat, digər dövlət müəssisələri isə ümumilikdə 25,8 milyon manat dividend ödəməli olacaq.

Prezident İlham Əliyev ötən il dekabrın 29-da "Dövlət mülkiyyətində olan və paylarının (səhmlərinin) nəzarət zərfi dövlətə məxsus olan hüquqi şəxslərin və publik hüquqi şəxslərin xalis mənfəətinin bölüşdürülməsinə və dividend siyasətinin ümumi parametrlərinə dair Qaydalar"ı təsdiqləyib. Qaydalar dövlət büdcəsinə dividend ödənişlərinə dair nəzarət mexanizmləri ilə bağlı hüquqi və təşkilati məsələləri tənzimləyir. Qaydalara əsasən, dövlət müəssisələri xalis mənfəətinin azı 30 %-ni dividend kimi dövlət büdcəsinə ödəməlidir. Bu, səhmləri ölkə hüdudlarından kənarda aparıcı birjaların listinq siyahısında yer alan dövlət müəssisəsinə şamil edilmir.

Oxşar xəbərlər

"AzerGold" QSC jurnalistlər üçün növbəti təlim və mediatur təşkil edib

İlham Əliyevin sədrliyi ilə dağ-mədən və metallurgiya sənayesinin inkişafına dair müşavirə keçirilib

İlham Əliyev "Bakı Enerji Həftəsi"nin rəsmi açılış mərasimində iştirak edib - YENİLƏNİB-3

SOCAR-ın təşkilatçılığı, "Neftçi" və "Galatasaray" klublarının tərəfdaşlığı ilə şəhid və qazi övladları üçün "Futbol günü" adlı tədbir keçirilib

İlham Əliyev Pirallahı Sənaye Parkında dərman istehsalı müəssisəsinin açılışında iştirak edib