Fransanın paytaxtı Parisdə azərbaycanlı rəssamların əl işlərindən ibarət "Daha yaşıl gələcək naminə incəsənət" adlı sərginin açılış mərasimi keçirilib.

"Far.Az"un yerli bürosu xəbər verir ki, tədbirdə Azərbaycanın Fransadakı səfiri Leyla Abdullayeva, Azərbaycanın UNESCO yanında daimi nümayəndəsi Elman Abdullayev, fransalı incəsənət xadimləri və digər qonaqlar iştirak edib.

Səfir Leyla Abdullayeva tədbirdə çıxışı zamanı Azərbaycanın beynəlxalq ictimaiyyətin etibarlı və məsuliyyətli üzvü kimi iqlim dəyişmələrinin fəsadlarına qarşı mübarizəyə verdiyi töhfələrə toxunub.

O, bu ilin Azərbaycanda "Yaşıl dünya naminə həmrəylik ili" elan edildiyini qonaqların diqqətinə çatdırıb.

Sərgidə Azərbaycanın xalq rəssamı Sakit Məmmədovun, o cümlədən Xanlar Əsədullayev, Nərmin Nəsibova, Aqşin Kazımov, Mahir Qafarov, Nihad Ağazadə, Çinarə Baxşıyev-Cəfərova, Aynur Məmmədova kimi rəssamların, eləcə də gənc istedadlar Nazilə Fərzullayeva və Məryəm Abdullanın əsərləri nümayiş olunub.

Tədbirdə çıxış edən Azərbaycanın tanınmış xalq rəssamı Sakit Məmmədov sərginin keçirilməsi təşəbbüsünün qlobal mədəni dəyərə verilən töhfə olduğunu, bunun da yalnız hökumətlərin deyil, hər bir vətəndaşın borcu olduğunu bildirib.

Fırça ustaları əl işlərində ətraf mühitin mühafizəsini təbliğ etməklə yanaşı, Azərbaycanın dinamik mədəni və təbii irsini də əks etdiriblər.

Qeyd edək ki, sərgi Azərbaycanın Fransadakı səfirliyi tərəfindən "Yaşıl Dünya üçün Həmrəylik İli" çərçivəsində təşkil olunub.

Oxşar xəbərlər

İlham Əliyev V “ADEX-2024” və “Securex Caspian” sərgiləri ilə tanış olub - YENİLƏNİB-2

Prezident İlham Əliyev Qarabağ Universitetinin təmirdən sonra açılışında iştirak edib - YENİLƏNİB-4

Mehriban Əliyevanın doğum günüdür

Bakıda COP29-un Liderlər Sammitinin açılış mərasimi keçirilib - YENİLƏNİB-2

Azərbaycan İstanbul Beynəlxalq Kitab Sərgisində ilk dəfə fəxri qonaq kimi çıxış edir