Azərbaycanda büdcə qanunvericiliyi, dövlət satınalmaları və dövlət investisiyaları sahəsində pozuntuların nisbəti ciddi dəyişməyib.

"Far.Az" xəbər verir ki, bunu Hesablama Palatasının sədri Vüqar Gülməmmədov Milli Məclisin bu gün keçirilən plenar iclasında deyib.

Onun sözlərinə görə, 2025-ci ilin iş planına uyğun olaraq 5 analitik fəaliyyət həyata keçirilib, həmçinin səmərəlilik, maliyyə və uyğunluq auditləri çərçivəsində ümumilikdə 43 audit aparılıb:

"Bu auditlərin 6-da informasiya sistemlərinin auditinin bəzi elementlərindən istifadə olunub. Hesabat dövründə 3 audit isə məxfi rejimdə keçirilib. Nəzarət tədbirləri zamanı aşkarlanmış nöqsanların təsnifatı hesabatda ətraflı əksini tapıb və bu təsnifləşmə uyğunluq, maliyyə və səmərəlilik aspektləri üzrə aparılıb. Təhlillər göstərir ki, say ifadəsində büdcə qanunvericiliyi, dövlət satınalmaları və dövlət investisiyaları sahələrində pozuntuların nisbəti ciddi dəyişməyib".

V. Gülməmmədov əlavə edib ki, ötən il büdcə vəsaitlərinin idarə olunması sahəsində 36 nəzarət tədbiri üzrə nöqsanlar aşkarlanıb:

"Ən yüksək paya malik olan nöqsanlar büdcə qanunvericiliyi ilə bağlıdır. Bu çərçivədə qurumlar tərəfindən proqnozlaşdırma və icra prosesinə lazımi diqqətin yetirilməməsi, maliyyə və fiskal intizamın tam təmin olunmaması kimi hallar üstünlük təşkil edir. Nəticədə bəzi qurumlarda aşağı icra səviyyəsi, nəticə əsaslı dövlət sifarişi mexanizmlərinin formalaşdırılmaması, vəsaitlərin təyinatı üzrə istifadə edilmədən digər hesablara yönəldilməsi, eləcə də dövlət sifarişi şərtlərindən kənar xərclər müşahidə olunub".

Oxşar xəbərlər

“Dövlət informasiya ehtiyatlarının və sistemlərinin Nümunəvi Əsasnaməsi” təsdiq edilib

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında iştirak edib

SOCAR-ın təşkilatçılığı ilə Hüquq və Uyğunluq Forumu keçirilib

İlham Əliyev Cənub Qaz Dəhlizi Məşvərət Şurası çərçivəsində nazirlərin 12-ci iclasında çıxış edib

İlham Əliyev Xocavəndin Xanoba kəndində fərdi evlərin və infrastrukturun bərpası sahəsində görülən işlərlə tanış olub